FusionCenterJO (2).JPG
– Ayera mainta segun Minister di Husticia, tabata un momento importante pa loke ta trata combatimento di criminalidad na pais Aruba como tambe den Reino. Tur instancianan cu ta combati criminalidad a bini hunto pa firma un trato cual lo permiti nan pa comparti informacion den un manera mas structura y preciso cu otro.
Despues di e prome conferencia riba crimen cibernetico na Aruba, Caribbean Cyber Crime, tur instancianan di husticia a bini hunto pa firma un acuerdo unico. Un ‘Fusion Center’ ta un sistema di comparti informacion cu ta diseña pa haci e trabao di e instancianan di husticia hopi mas eficiente. Aruba ta e prome den Reino pa bin cu un plataforma manera esaki. E contracto aki ta bao responsabilidad di Ministerio di Husticia kende ta responsabel naturalmente pa Cuerpo Policial anto e doño di e informacion. E cos mas importante ta cu tur esaki ta tuma luga door di e consciencia cu compartimento di informacion ta importante, pero bao guia di Ministerio Publico, basa riba e informacion cu tin, kende na final di dia ta e instancia cu ta dicidi di lanta caso of persigui un persona. ”Esaki ta algo masha bon hinca den otro pa garantisa cu tur informacion cu tin, ta wordo uza conforme e reglanan cu ta stipula den nos pais, un estado di derecho cual mi ta kere a wordo demostra cu e ta bon bibo y cu e ta funciona bon tambe,” Minister Dowers ta comenta. 
 
Miho structura
Sinta na mesa den e conferencia di prensa aki tabata entre otro Fiscal Mayor, Minister di Husticia,  y Korps Chef di pais Aruba. Otro partidonan presente den e firmacion aki tabata Recherche Samenwerkings Team na Aruba (RST) y Kustwacht. Ora bo ta haci falta di informacion, esaki ta perhudica bo investigacion grandemente anto pa e motibo aki, un sistema manera esaki ta diseña pa percura cu bo tin tur e informacion necesario pa tuma e decisionnan adecuado. Ministerio di Husticia ta bisa cu nan semper a traha hunto pero cu awor haciendo esaki cu mas hende, den un forma mas structura manera cu nan ta bay haci e cu e ‘Fusion Center’ aki, nan ta convenci cu e posicion di informacion ta bay bira mas fuerte. 
Trabao mas eficiente
Un cos importante cu a wordo determina hopi aña pasa segun Minister Dowers, ta cu mester comparti informacion den un forma mucho mas eficiente di locual nan ta haciendo te na e momentonan aki. 7 aña pasa ora cu Minister Dowers a asumi responsabilidad como Minister di Husticia, el a mira esaki como un di e cosnan di mas fundamental pa bo por garantisa cu e trabao cu nan ta haci ta eficiente. Minister Dowers ta splica: ”Nos tin hopi menos medionan financiero cu porta tabata tin antes cu por gasta y nos tin hopi mas reto cu nos mester cumpli cu ne pa loke ta trata siguridad. Esey ta nifica cu bo mester traha mas eficiente y no solamente den mundo di siguridad pero den hopi otro profesionnan, bo ta mira cu trabaonan ta bay mas miho ora bo ta garantisa cu e comunicacion ta optimal.”
 
Siguridad no tin ‘deadline’
Den un publicacion anterior di Bon Dia Aruba, Minister Dowers ta splica cu tur e puntonan cu a wordo treci pa dilanti pa e comision Pro Siguridad ta exactamente e cosnan cu su maneho ya caba tabata haciendo. Aunke den e conferencia di ayera no a haci ningun referencia na e grupo di Pro Siguridad cu a organisa e marcha contra criminalidad riba 13 di October,  Ministerio di Husticia hunto cu tur otro instancia di siguridad a briya di orguyo pa por a tuma e paso aki pa pais Aruba cual nan ta enfatisa lo trece mehoracion den e combate di crimen.”Nos tin diferente organisacionnan cu ta existi di berdad anto nan ta traha hopi duro pa combati crimen na nos pais, reduci risiconan pa nos comunidad y asina ey contribui na e felicidad y trankilidad di nos hendenan,” Minister Arthur Dowers ta bisa.