Recientemente a aproba peticion di pais Aruba pa bira un ‘Hub’ regional pa e area di Caribe, esaki a sosode durante e reunion entre Minister Chris Romero y Director General di Union Postal Universal, Bichard Hoessein.

Hoessein a indica cu esaki ta un di e puntonan mas primordial di Instanbul Postal Strategy 2017-2020, y cu e ta sumamente contento cu e desaroyo aki den y pa e region Caribense.

E hub aki lo nifica cu tur post di Caribe lo pasa via Aruba y for di nos pais esakinan lo wordo distribui pa e otro islanan den Caribe, y kisas tambe pa e paisnan di Latino America mas cercano.

Den e reunion entre UPU y Ministerio di Transporte, Comunicacion y Sector Primario di Aruba, tabata presente tambe Pascal-Thierry Clivaz, kende ta ‘Deputy Director General’ di UPU, Rudy Cuadra, cu ta ‘Director of Development and Cooperation’ di e International Bureau di UPU, Theo Kock, Presidente di Hunta di Supervision di Post Aruba NV, Luigi Bergen, kende ta liaison di Ministerio di Transporte, Comunicacion y Sector Primario encarga cu sector postal, como tambe secretario general di ‘Caribbean Postal Union’, Guillermo Raymond.

Hoessein a gradici Minister Romero pa su intervencion na e Congreso 2018 di ‘Caribbean Postal Union’ na St. Lucia. Danki na Minister Romero su intervencion, un pais Caribense mes a bira Secretario General di CPU, den persona di Guillermo Raymond, kende na mes momento ta e Director actual di Post Aruba NV. UPU lo asisti Aruba cu tur guia necesario pa e ‘hub’ bira un realidad.

Durante e reunion Hoessein a duna instruccion pa su ekipo di trabou bin cu un mapa di conectividad entre e islanan Caribense. Tambe e ta desea pa un haci un evaluacion di con post por drenta y sali di Merca, den caso cu e pais aki dicidi di retira su miembresia for di UPU, manera ta wordo premira y no tin e servicio di USPS mas.

Director general di UPU ta kere firmemente cu mester sigui traha di cerca cu Duana di Aruba pa asina facilita e ‘flow’ di cantidad di pakete cu ta bay drenta y sali for di nos pais. Minister Romero a gradici Hoessein pa aproba e proyecto y a indica cu e proyecto aki lo bira un prioridad den su maneho y cu lo ta na bienestar di e sector postal.