The STEM Embassy ta un luga di conocemento y recursonan cu tin como obhetivo yuda e hobennan di e islanan di Aruba, Boneiro y Corsou den e auto descubrimento di desaroyo den e areanan di Ciencia, Tecnologia, Ingenieria y Matematica (STEM) na unda nan ta organisando e prome Youth Hackathon: The Sustainability in Motion Robotics Challenge na Aruba pa e proximo 29, 30 di april y 1 di mei.

Na un hackathon, programmeur, diseñadornan, y personanan cu interes den tecnologia ta bin hunto pa colabora intensivamente pa crea productonan nobo di software of hardware durante un periodo di un dia pa un siman. E meta ta pa crea solucionnan innovativo pa problemanan specifico of simplemente pa explora ideanan nobo den un ambiente creativo y rapido.

Hackathon ta popular den organisacionnan tecnologico, companianan, scolnan, y universidadnan rond di mundo.

Pa e motibo ey, nan ta organisando e conferencia aki pa asina libera e potencia di e hobennan innovador na Aruba. The “Sustainability in Motion” Robotics Challenge ta un desafio di 3 dia dirigi pa studiantenan di scol secundario entre 14 pa 18 aña, nan ta haya e tarea di crea un diseño di un sistema nobo di transporte sostenibel pa Aruba sea un tram electrico of busnan di hidrogeno.

E tipo di desafio aki ta yama hackathon caminda varios ekipo ta bay participa den e desafio y ta bay competi y traha hunto.

Den e prome dia nan ta bay haya tayernan y ta bay configura nan robot, profesionalnan den area ta encarga di duna e tayernan ey.

Den e di dos dia, nan ta bay completa e construccion di e robot y ta bay caba di programa nan, realisando un test pa wak si nan ta funciona.

Den e di tres dia ta bay tuma luga e desafio oficial, ta bay tin un arena grandi unda ekiponan participante ta bay completa un serie di desafionan y nan ta bay gana puntonan den e panel di hues.

E prome dos dia di evento, 29 y 30 di april ta bay tuma luga na Universidad di Aruba for di 8 or di mainta te cu 5 or di atardi y dia 1 di mei na Aruba Marriot Resort for di 12 or di merdia te cu 8 or di anochi.

Ekipo ganado di desafio ta bay tin e oportunidad di representa Aruba na e First Global Challenge 2024 cu lo tuma luga na fin di luna di september na Atenas, Grecia. Na e First Global Challenge di 2023 nan tabatin un ekipo cu a representa nan na Singapur.

Ekipo di STEM ta consisti di studiantenan local y hobennan profesional cu tin un pasion pa STEM, nan ta un ekipo exclusivamente di e islanan cu tin e mesun pasion di duna algo back na nan paisnan di origen.

Potretnan ta pertenece na Facebook page The STEM Embassy.