Cerca di intervencion di Reino?

Na aña 2009 gobierno di Reino Uni (United Kingdom) a dicidi cu ta basta cu corupcion na e islanan Caribense conoci como Turks & Caicos. E corupcion a yega na tal nivel, cu e sospechoso mas grandi tabata e prome ministro (Michael Misick) cu tabata envolvi den corupcion, acumulando un fortuna, principalmente den emision di tereno na desaroyadornan di proyecto, hasta di tereno cu tabata propiedad di Corona Ingles. Durante un bishita di un delegacion di parlamentario Ingles a reporta cu tabata existi ‘un clima di temor’ riba e islanan. E investigacion a trece afo cu Misick y su esposa, un actriz, tabata gasta un fortuna cu un bida di luho, incluyendo champaña, paña di diseñador y jet priva.

No tabata mira otro opcion cu tuma rienda di gobierno di e islanan. A decreta un resolucion como organo supervisor, cu a kita gobierno y a elimina parlamento tambe, poniendo tur poder, ehecutivo y legislativo, den man di e gobernador. Esaki pa haya oportunidad di ‘clean up the mess’ y restaura orden den e pais, pa despues gradualmente re-introduci democracia parlamentario, y duna gobernacion local un oportunidad atrobe. Mester bisa na fabor di e parlamento cu nan a haci nan trabao, den e sentido cu un investigacion parlamentario a trece claridad riba e delitonan cometi, y cu a trece na luz di dia tambe e envolvimento di diferente ministro den e crimennan cometi. Nos ta mira algo asina tuma luga na Aruba? Aki nos por ripara cu no ta tur luga chikito ta mescos… nos tin hopi di siña ainda. Na 2012 tabatin eleccion atrobe na e islanan, despues cu e intervencion a termina den enhuiciamento di 13 hende, entre nan cuatro ministro di e gabinete cu a keda destitui pa e decreto real, inclusivo e ministro presidente. Mester bisa tambe cu e partidonan politico a keda hopi rabia cu e accion di Reino Uni y a acorda cu nan ta bay traha riba independencia total di e islanan di Reino Uni.

Pregunta: algo inimaginabel na Aruba? Pa hopi aña si esey tabata asina, pero diripiente no mas. Nos ta enfrenta actualmente un caso hopi mas grandi cu esun di Turks & Caicos. Por ta no na e nivel di cantidad di ministro envolvi (ainda), pero na cantidad di sospechoso sigur cu si. Y esey ta e parti cu ta encera e caso di ‘ontheffing’, cu su ramificacion den e otro ministerio pa yega na claridad ainda. Ainda ta na caminda riba su mes e asunto di negoshi di tereno den tur su magnitud… Loke ta importante y urgente pa sa, ta kico lo ta e siguiente pasonan pa tuma den nos situacion. Ta bon pa comprende anto cu dentro di Reino, semper ta tene cuenta cu na un di e islanan por surgi un situacion asina urgente, cu gobernacion, y principalmente garantia di orden y siguridad ta bira un problema, cu ta necesario suspende gobierno local y impone un orden di otro categoria. Nos tin, a proposito, un ehemplo di un situacion asina dentro di Caribe Hulandes, cu ta e intervencion di Reino na St. Maarten, pa hopi decada considera ‘het jongetje dat niet wil deugen’ entre e islanan, pero na e altura aki ta probabel cu nos a surpasa e rumannan na e isla ey grandemente, y no den algo positivo.

Pero, den un caso concreto, cu e situacion na nos isla yega asina leu cu intervencion di Reino ta inevitabel, kico concretamente ta e pasonan cu lo bay tuma lugar? Na prome lugar, ta trata di conserva poder publico, y poder finalmente ta keda expresa den un forsa arma cu ta capaz di controla orden y siguridad publico. Si esey ta garantisa pa cuerpo policial mes, anto esey ta bon. Den caso di duda, sin embargo, tin un forsa arma Hulandes presente pa garantisa esey, y por haya refuerso di otro banda di oceano. E medida tin como consecuencia cu gobierno y parlamento ta bay cas, y e gobernador lo mester goberna, manteniendo tur e departamentonan di gobierno intacto y funcionando. Pa esunnan cu como funcionario publico no kier coopera, tin medida pa tuma pa obliga nan traha lealmente, o perde nan trabao. No pensa cu esaki no ta posibel. Den e KB di 2014, esunnan cu a lesa esey sa cu e Gobernador por exigi e colaboracion di tur cu ta den servicio publico. Nos por corda cu nos prome ministro a manda un carta pa tur hefe di servicio pa no colabora, pero aparentemente masha lihe nan mester por a bise cu obstaculisa trabao gubernamental por tin consecuencia hudicial cu ne.

E periodo di intervencion por ser uza pa introduci legislacion cu e partidonan politico – no tur – no kier introduci. Ehemplo: ley riba financiamento di partido politico; ley di ombudsman, pero ombudsman cu no ta depende di mayoria den parlamento; introduccion di miho control riba fundacion di (partido) politico; screening prome y despues di sirbi como ministro/parlamentario; mas autoridad pa Rekenkamer; control adecua den e procesonan administrativo sensitivo, manera e trayectonan di permiso. Tur ta medida cu ta haci dolor, pero no pa pueblo, sino pa e politico cu no tin pensa di bira integro.