E aña aki, San Nicolas ta bay ta e epicentro di arte y cultura na Aruba na unda diadomingo 19 di mei lo cuminsa cu un feria gastronomico y show multicultural y dia 21 di mei lo tin un parada di Paz y Unidad.

E encuentro aki ta relaciona cu Dia Mundial di Diversidad Cultural pa Dialogo y Desaroyo” declara pa UNESCO, Ministerio di Cultura Aruba conhuntamente cu Departamento di Cultura Aruba, Cuerpo Consular, UNESCO Aruba, Artisa y gruponan artistico, Folklore-Cultural estableci na Aruba di diferente pais manera Colombia, Hulanda, India, Italia, Jamaica, Peru, Filipinas, Santo Domingo, Suriname, Venezuela y otro ademas di Aruba, ta bay trece nan presentacion unico.

E proyecto aki e cual a ser crea na 2021, tin como meta central pa crea lasonan di union, genera e integracion y comparti cu otro e rikesa di mas grandi di Aruba manera ta nos multiculturalidad. Den pasado ya caba tabata celebra pa 15 aña consecutivo bou di e nomber di ‘Feria Multicultural’ cu tabata tuma luga riba dia 12 di october cu ta ‘Dia de la Raza’.

Ademas, ta un plataforma na unda tur pais tin e oportunidad di celebra nan cultura den forma di gratitud y ta topa cu otro den union y harmonia aportando p’e pas y unidad di tur e pueblonan di mundo.

Igualmente, ta pa crea un ambiente di convivencia pacifico, na unda respet, tolerancia y libertad di expresion artistico y cultural ta resalta, pa despues sigui promove esaki, presenta den combinacion cu un show di intercambio multidisciplinario cultural un tema di reflexion, un exposicion gastronomico y artesanal, crea un espacio caminda artista di tur genero por demostra nan talento y expresa na e publico presente, tur e potencial artistico cu tin na Aruba.

A traves di e “Encuentro Multicultural Aruba” DCA ta pusha pa stimula e pueblo di Aruba pa por sigui traha, biba, sinti y conserva e herencia cultural, material y no material. Proteha e patrimonio y legado cultural di cada nacionalidad y asina aki crea un espacio pa comparti e rikesa cultural di tur hende cu ta biba na Aruba.

E lema central e aña aki ta: “Pone e Arubiano na haltura di su cultura y siñe conoce di otro, e rikesa di nos pais ta nos multiculturalidad.”

Potret ta cortesia di Departamento di Cultura su Facebook Page.