Dia 8 di april parlamentario independiente Gerlien Croes a manda un peticion por escrito como miembro di parlamento na prome minister Evelyn Wever-Croes relaciona cu desaroyo infrastructural y construccion di hotelnan conforme articulo III.17 di Staatsregeling di Aruba y conforme articulo 59 di Reglement van Orde di Staten di Aruba.

Documento cu contesta di Minister Evelyn Wever-Croes: https://drive.google.com/file/d/16dfVpDdat-v36uOdF-ZKeqjGHM7lZy23/view?usp=drive_link

Den e documento, ademas a puntra tocante uso y maneho di e beachnan na e momentonan aki y den futuro y entre algun di e preguntanan tabatin lo siguiente:

  1. Si minister por comparti cu Parlamento di Aruba e cantidad di peticion pa permisonan precario cu tin actualmente incluyendo e fechanan di peticion pa permiso pa entre otro, pone strandstoelen, palapas, kleedhok, towelhut, massagehut, toilet, opslagruimte, lunchdecks, bars y otro actividadnan ariba beach incluyendo e zona di peticion y cantidad di meter cuadra?
  2. Si minister por comparti e lista di permisonan precario honra for di januari 2014 te cu maart 2024, cu referencia na e zona y cantidad di m2 honra?
  3. Minister por entrega un lista separa di peticionnan pa precario haci specificamente door di e hotelnan na Aruba incluyendo e fecha di peticion for di 2014 te cu maart 2024?
  4. Minister por specifica e cantidad di precario honra na hotelnan (Individualmente) cu a grandura di e zona y e fecha cu esakinan a ser otorga y/of a extende e permiso for di januari 2014 te cu maart 2024?
  5. Minister por comparti e manehonan di DIP cu tabatin pa e beachnan “strandbeleid” for di 2014 te cu maart 2024, incluyendo e cambionan specifico cu tabatin den e maneho durante e periodo aki?
  6. Por haci un lista individual di e permisonan precario duna pa palapa so y ken ta responsabel pa maneho di e palapanan den e zona (nan) specifico aki?
  7. Minister por comparti cu Parlamento di Aruba e lista di opcionnan cu a ser duna for di januari 2009 te cu maart 2024 pa construccion di hotel y condominio incluyendo e fecha cu e acuerdonan firma?

Pa esaki, Gerlien a puntra riba su rednan social cu “MEP ta culpa AVP pero MEP mes a beneficia di entre otro e dealnan y acuerdo pa traha 3 Ibero Star hotel 3 aña pasa tambe. Kico esaki ta bay nifica pa Aruba, pa nos uso di beachnan? Kico prome minister a acorda cu e hotelnan aki pa cu precario pa uso di nos beachnan?”

Pa dia 17 di mei prome minister Evelyn Wever-Croes ken tambe ta encarga cu cartera di Infrastructura, a contesta e preguntanan di e parlamentario na unda tambe a indica cu “Directie Infrastructuur en Planning ta enfrentando retrasonan importante como resultado di investigacionnan penal riba accionnan criminal di ex-ministernan di Infrastructura. E investigacionnan aki a causa un efecto di paralisacion den servicio, pa motibo cu e reclamonan di interes den investigacion, documentonan confisca etc. Pa suspension di funcionarionan involucra na varios investigacion penal pa loke no por cubri cu tur e vacatura. No tur informacion cu ta solicita ta disponibel den corto plaso, debi na e informacion antiguo. Awor e prioridad ta pa pone tur cos al dia y automatisa e proceso, loke ta nifica cu no por tin mas hende disponibel pa contesta preguntanan vooral di periodo 2016. E plan di recuperacion ta bay duna su frutonan den proximo lunanan na unda e Administracion lo por reanuda e funcionamento back di manera normal y por haya informacion adicional.”

Pa loke ta trata e cantidad di proyectonan di hotel cu ta registra na DOW y ta den fase di construccion of planificacion ta e siguiente proyectonan:

  • Iberostar Aruba Sands cu 240 camber cu fecha di entrega pa december 2024
  • Secret’s cu 300 camber cu fecha di entrega pa december 2024.
  • St. Regis cu 220 camber cu fecha di entrega pa december 2024.
  • Hilton cu 161 camber mas cu fecha di entrega pa juli 2025.

Total: 925 camber.

Proyectonan cu te ainda no tin informacion si lo tuma luga:

  • Divi Phoenix cu 150 camber sin fecha di entrega conoci.
  • Iberosol TdS cu 200 camber cu construccion planea pa september 2024.
  • Iberostar WaterPark cu 400 camber cu fecha pa 2026.
  • Secret’s Fase 2 y 3 cu 596 camber pa periodo di 2026/2028.

Ademas, e parlamentario di MEP, Marco Berlis tambe a haci algun preguntanan na prome minister tocante e mesun topico di hotelnan na unda den e contestanan di prome minister a señala cada ex-minister di Infrastructura cu e cantidad di hotelnan cu nan a otorga por ehemplo el a indica cu Marisol Lopez-Tromp den su periodo como minister encarga cu e cartera aki for di januari 2009 te cu october 2009 a otorga un cantidad di 320 camber na Desarollos Hotelco Corporation DHCAruba/Ritz Carlton y na Natura Envelopment N.V/Embassy Suites un condominio di maximo 20 unit cu despues a ser extendi na 372 camber mas segun a indica bao maneho di ex-minister Benny Sevinger ken for di 2010 te cu 2017 a otorga aproximadamente 3.399 camber na otro hotelnan.

Pa loke ta trata ex-minister Otmar Oduber den aña 2019 a otorga 1,049 camber lo cual a ser reduci na 363.

Pa mas informacion, riba nos website por haya e documento completo di e contestanan.