E di dos Conferencia Anual riba Energia ta un colaboracion entre Gobierno Aleman y Gobierno di Aruba, y lo tuma luga na Aruba riba diamars dia 5 di november proximo na Renaissance Convention Center.
E enfoke principal di e Conferencia lo ta riba ‘Renewable Island Solutions and Energy Efficiency’. Den e cuadro di e temanan aki lo tin un discusion entre participantenan Aleman y participantenan di Caribe, cu e obhetivo pa logra un transicion di energia sostenibel den e region di Caribe.
Alemania ta un di e economianan mas grandi di mundo y un lider den transicion general di energia pa energia renobabel. E sosten y promocion relaciona cu Smart and Sustainable Energy Solutions a resulta na Alemania den un industria cu ta ofrece conocemento y tecnologia mundialmente renombra. Y esakinan ta netamente loke ta bay presenta durante e di dos German-Caribbean Energy Conference na Aruba.
E apertura di e conferencia lo tuma luga door di Prome Minister Evelyn Wever-Croes. E programa ta sigui cu un presentacion di e prestigioso Instituto Aleman di Investigacion Fraunhofer, cu lo presenta solucionnan den cuadro di Regional Energy Production and Consumption on Islands and Off-grid Regions. Ademas di esaki Prof. Dr. Manfred Norbert Fisch lo enfoca riba eficiencia di energia den edificionan y na nivel di ciudad.
E momento culminante di e Conferencia lo ta e parti di e panel di discusion, consistiendo di expertonan riba e tema di energia cu lo elabora riba un vision riba transicion di energia na nos islanan den Caribe. Banda di esaki empresarionan Aleman lo presenta nan productonan innovativo y tecnologia riba Sustainable Energy Generation, Energy Efficiency, Consulting and Project Financing cu lo por realisa na Aruba y den resto di Caribe.
E di dos German-Caribbean Energy Conference lo tuma luga den cuadro di un mision comercial di Alemania organisa pa Camara di Comercio Aleman-Hulandes representa door di Alexandra Sierra y Elisa Gentzsch. Despues di un mision exitoso na 2018, e interes di empresarionan Aleman ta grandi pa t’ey un biaha mas na Aruba. E biaha aki e empresarionan lo introduci solucionnan innovativo ‘Made in Germany’. E delegacion Aleman e aña aki lo ta mas diversifica cu esun di 2018, extendiendo di turbinanan di biento chikito pa sistema di bateria, verf cu por zorg pa eficiencia den uzo di energia y solucionnan pa trata ‘brown algea’ den Biogas. Banda di e conferencia lo tin oportunidad pa reuni cu e companianan Aleman den e transcurso di dianan 4, 5 y 6 november na Aruba y 7 -8 november na Corsou.
