Recientemente 100 bishitante cu tabata na Aruba a ricibi un sorpresa inespera. Nan a haya invitacion pa participa den un competencia di relahacion cu a ser presenta pa nada mas y nada menos cu atleta olimpico ganador di medaya di oro, Shaun White.
E evento cu a tuma luga na Eagle Beach, segun e portal NBC Miami a reporta, a invita 100 turista cu tabata di bishita na Aruba cu a aplica pa e competencia despues di a ricibi un QR code durante nan estadia na e hotelnan na e isla.
Kico e competencia tabata encera? Facil, e participantenan mester a djis sinta pa mas cu un hora durante e golden hour, bahada di solo, riba lama y disfruta di e brisa di atardecer. Pero e participantenan tabata completamente desconecta di nan telefon y simplemente mester a sinta y relaha.
Sinembargo, e competencia a trece algun sorpresa cune. E portal Mericano a indica cu e participantenan a haya un monitor di curason pa midi e ritmo di nan curason y nan a encontra algun prueba pa wak si di berdad nan por keda riba “island time” memey turbulencianan cu tabata sucede rond di nan.
“Nos tabata kier tira e pruebanan aki pa purba acelera e ritmo di curason di e hendenan,” White a bisa den un entrevista cu NBC Local. “Nos tin muchanan ta pasa coriendo tirando santo of cuminsa un pelea di pistol di awa.”
White a bisa cu el a haya hopi placer presentando e evento y cu hende tabata keda puntra kico e mes lo haci pa prepara pa evento asina. E solamente a conseha e hendenan pa keda calmo y pone nan enfoca riba e bunita isla Caribense rond di nan.
“Mi ta kere, ta basta dificil pa stress ora bo ta aya. Tur hende ta riba “island time”, esaki ta simplemente e luga mas relahante y increibel,” White a bisa.
E ganador di e competencia ta ricibi e titulo di “E Persona Mas Relaha di Mundo” ora e competencia wordo transmiti den luna di augustus. E top tres ganadornan lo ricibi un premio increibel pa nan rindimento relahante.
