Aruba ta anfitrion di seminario di Nacionnan Uni tocante Ley di Refugiado

Nacionnan Uni a organisa dos dia di seminario riba e tema ‘ Ley di Refugiado’ cu Aruba como anfitrion. Den Renaissance Convention Center e participantenan na e seminario aki durante dos dia a tende di e ultimo desaroyonan riba e tereno aki y e solucionnan pa un tema asina fuerte. Desde di dos guera mundial mundo no a conoce un movecion di refugiado asina grandi manera tin actualmente. 22 miyon hende ta migrando di nan pais, di un luga pa otro pa motibo di guera, di hamber, secura, persecucion y asina por sigui.

Minister Richard Arends ta bisa cu no ta prome bes cu Aruba ta cede di reunionnan di Nacionnan Uni. “Ya caba nos tin e United Nations Centre of Excellence pa SIDS (Small Island Development States) cu tin un establecimento permanente aki na Aruba. Durante e ultimo lunanan nos a mira diferente conferencia di Nacionnan Uni na Aruba. Awe un biaha mas e High Commisionner pa Refugiadonan a scoge Aruba pa ta cede di un serie di curso y trainingnan tecnico pa region. Ta yena mi cu orguyo con un pais manera Aruba cu aunke e no tin un cuerpo legal internacional ,nos ta pertenece na Reino Hulandes – a sa di posiciona su mes internacionalmente pa atende cu nos problemanan energetico local, pero tambe di un manera of otro contribui y brinda un input na otronan pa loke ta trata e ambito internacional manera eleccion di Reino Hulandes den e Conseho di Siguridad Hulandes.”

E seminario di UN ta enfoca riba dos aspecto hopi interesante, un di nan ta e topico di Refugiado, pero tambe e asunto di personanan cu no tin un nacionalidad. Nacionalidad ta un derecho humano. Sr. Arends ta bisa: “Mi ta sigur cu e instancianan di gobierno presente manera DBB, DIMAS y Cruz Cora ta sigui e cursonan cu hopi atencion. Awe mainta nos a wordo elogia tambe door di e representantenan di e High Commisioner pa Refugiado pa e Plan di Accion cu nos tin cla ora un persona pidi un asilo di refugiado aki na Aruba. Nos ta haya aki 10 peticion a base anual, pero nos ta monitor e situacion den region diariamente. Esaki pa wak si nos mester ahusta nos plan y na ki momento.”

E minister ta bisa cu e sorto di seminarionan asina ta hopi importante pa intercambia conocemento. Di nos conocemento y esun di otro paisnan na nos. “Refugiado ta bin den tur nacionalidad y di tur pais. Importante ta pa reconoce e status di refugiado y kico ta e derechonan di un refugiado na momento cu e haya asilo.”