Awe segun planificacion ta tuma luga e reunion publico pa trata e ley encuanto CITGO y Valero. Mientras cu practicamente henter parlamento ta na fabor di e continuacion como un ‘upgrader’ di crudo, tin hopi pregunta a keda sin contesta. Por ta cu tin un contesta den e 2000 pagina di texto pero no ta sigur cu oposicion ta logra descubri nan. Pero algun ta na bista caba.
Den e resumen di e riesgonan cu Conseho Consultivo (RvA) ta mira tin e posibel cambio di legislacion cu por afecta e operador. Esaki por ta e posibilidad cu Aruba ta bin cu leynan ambiental cu no ta existi awor y di cual nos por sa awor caba cu den tur caso esey ta costa hopi placa? E unico compromiso conoci ta cu e planta mester bay opera cu gas natural, pero di comentario te awor nos no por destila cu tin garantia den e documentonan. No ta conoci cu si acaso e financiamento pa e tuberia keda stagna, e upgrader por cuminsa opera a pesar di esey. Si esaki gobierno a propaganda como un di e condicionnan duro, ta importante pa por mira esaki preto riba blanco. Conclusion: Citgo a logra cu nan por opera e upgrader sin cu tin leynan ambiental? Y ademas cu un upgrader cu ta crea su propio problemanan adicional ambiental pa motibo di e gran cantidad di desperdicio cu ta keda despues di procesa e crudo pisa aki? Loke ta pinta nos dilanti awor ta cu nos por wel di bin cu ley ambiental, basta cu nos mes paga tur cos! Esey ta e deal?
Otro asunto cu a capta nos atencion ta e noticia cu CITGO lo a pidi PDVSA pa pone un suma di $100 miyon disponibel pa por start e rehabilitacion. E ta recorda nos cu algun aña pasa, PDVSA a trata di negocia un acuerdo cu Valero pa cuminsa opera di nobo, pa produci entre otro nafta pa Venezuela. E nafta, mescos cu awor, ta necesario como diluyente den e crudo ultra pisa Venezolano. E tempo ey tabata papia di e necesidad di e mesun suma, $100 miyon, pa pone e planta opera atrobe. E deal no a sigui pasobra e tempo ey, fin di 2013, ya caba PDVSA tabata incapaz pa pone placa cash riba mesa y en cambio kier a bay den un ‘barter deal’ cu Valero, den cual lo a paga Valero cu crudo Venezolano na luga di placa. Valero a nenga esey y nos ta unda nos ta awe. Awor ta pidi PDVSA pone 100 miyon dollar pa por cuminsa cu un prome start up na mita di 2017, pero na e momento ey lo tin gas natural disponibel caba? Of ta cuminsa ‘as is’?
Henter e asunto ta haya un toke mas interesante ainda, awor cu a bira conoci cu na Curaçao ta existi e posibilidad cu PDVSA lo no continua cu su operacionnan despues di 2019. Gobierno di Curaçao ta en busca di siguridad pa futuro y tin un MOU caba cu un compania Chines pa modernisa e facilidad. En todo caso di PDVSA den su estado financiero deplorabel actualmente no por spera cu nan por inverti un suma di $10 biyon pa logra esaki. Pa PDVSA (y Venezuela) e perdida por ta considerabel. Contrario na e refineria na Aruba esun na e isla ey ta produci un gama extenso di producto, entre nan gasolin y diesel di calidad. Parti di e produccion di Curaçao ta pa abastece e mercado interno di Venezuela mes, awor cu su instalacionnan na Amuay ta funciona na 50% di nan capacidad. Ademas desde algun tempo Curaçao ta sirbi tambe como base pa mescla di crudo liviano importa di entre otro Merca, cu crudo pisa di Venezuela pa yega na un crudo mediano cu por exporta despues. Tur e posibilidadnan aki pa crea alternativa pa move cu su produccion por bay perdi dentro di 3 aña y ta haci cu e presion pa por cuminsa algo na Aruba a bira mas grandi. Mester tene na mente si cu e produccion diversifica cu tin na Curaçao no ta contempla den e plannan na Aruba.
Tur esaki ta haci e pregunta mas urgente ainda, si bao di e acuerdo actual CITGO por cuminsa opera e planta sin warda e transformacion pa gas, cu e mesun proceso sushi y contaminante di semper. Pasobra si esaki ta berdad, anto pa e promesa di 700 cupo di trabao, ‘hay que ver para creer’, nos ta haya atrobe e mesun San Nicolas sushi y pestilente di semper bek y nos ta condena na soporta esaki pa e proximo 15 of 25 aña. Ademas pa nos con pa resolve e problema di vivienda pa un par di mil trahado Venezolano cu mester bin traha aki. Tin bastante pregunta cu a keda habri y mirando e actitud di soberbia di gobierno den e asunto aki probablemente esey lo keda asina. Pueblo a cuminsa custumbra cu cada tanto aña nos ta haya e tipo di aventura aki di e partido den gobierno?
