Nuevo Mundo Fundation ta un festival cu a tuma luga na Venezuela diesdos aña pasa, y esey ta dun’e e prestigio di ta e festival di musica di academia y camara di mas grandi. E proyecto a ser descubri pa Sr. Clyde Harms den un bishita cu el a haci na Venezuela, y eynan el a conoce Simon Gollo, musico Venezolano y Europeo, invita pa Harms pa bin na Aruba y asina a cuminsa Aruba Symphony Festival.

Diaranson pasa a tene un conferencia di prensa na Cas di Cultura cu e organisadonan di Aruba Symphony Festival, esta Clyde Harms, Simon Gollo, Jhonny Croes, entre otro, y nan a informa cu e concierto aki lo tuma luga dia 17 di juli proximo na diferente luga di e isla.

Simon Gollo, director artistico di e concierto, a duna di conoce cu esaki ta e di cinco edicion cu tin e obhetivo di promove un di eventonan, cu na otro paisnan, ta bisto como e mas importante pa e desaroyo di e musica clasico y di crecemento academico den e Caribe.

El a splica cu e aña aki, nan ta anuncia 13 concierto, di cual 8 di nan lo ta gratis, cu e fin di acerca mas na e comunidad Arubiano den diferente perspectiva y generacion. Un di su principal mision ta pa tin studiante di varios pais manera Aruba, y esaki ta haci cu Aruba lo converti den un referencia artistico.

Asina tambe el a destaca cu tin mas di 20 artista internacional, incluyendo talento Arubiano, cu ta invita pa e evento aki, cu cada aña tin un programacion varia y lo presenta na Cas di Cultura, Casibari, Paseo Herencia, Hotel Ritz Carlton y Freewinds. Esaki ta demostra cu e festival no lo kier ta na e mesun luga so, sino tambe na varios luga cu den futuro nan ta espera di haya concierto na otro comunidadnan di Aruba como San Nicolas, pa asina e hendenan por uni pa e esfuerso aki di desaroyo educativo, cultural, y artistico.

“Esaki ta un gran fiesta musical, pero tambe ta un proyecto di desaroyo cultural, social y educativo”, Gollo a sigura.

Di mesun manera, Gollo a bisa cu prome tabata un vision, cu awor ta un realidad, di 10 concierto cu nan a haci pa e di cinco aña, cu un total di 50 concierto cu cierto cantidad di artista cu a yuda pa e festival por tin mas apoyo y entusiasmo.

Di loke ta trata concierto pa hobennan, Gollo a contesta cu e conciertonan cu nan lo ofrece ta concierto dirigi pa tur hende, nan no ta dirigi ni pa un clase social ni pa un edad specifico. “Esaki ta un oportunidad pa hubentud biba algo diferente na loke e desaroyo tecnologico ta ofrece awendia”.

Tambe Gollo a splica cu e musiconan di e evento aki nan ta di casi tur Latino America y Merca. El a sigura cu desde e prome edicion, nan semper tin habri un espacio pa e musiconan di Aruba na diferente formato, como por ehempel, e aña aki lo presenta muchanan cu lo bay canta den e festival pa duna e bonbini na tur e artistanan internacional.

Sr. Jhonny Croes, docente di musica y miembro di e directiva di Aruba Symphony Festival, a expresa cu e evento aki tambe ta promove y mantene e tocamento di musica en bibo, y asina Aruba lo por tin su mes orkesta hubenil. “Musica clasico semper ta forma parti di nos cultura”, Croes a comenta.

Croes a bisa cu como docente di musica, e musica clasico ta keda como gran parti di educacion di musica y p’esey e festival aki ta causa hopi impacto pa e comunidad.