For di diahuebs ultimo, nos isla a bira un epicentro den nos region Caribe di e musica clasico contemporaneo. Esaki danki na e Aruba Symphony Festival (ASF) 2017, cu a cuminsa diahuebs ultimo y cu ya caba a celebra su di tres concierto ayera.

Durante casi 10 dia Aruba ta huesped di e presencia di musiconan di caliber internacional manera e violinista Dimitri Berlinsky kende a bira e competido mas hoben den historia cu a gana e Papanini International Violin Competition na Genoa (Italia), entre otro musiconan virtuoso presente den e festival academico aki. Pero tambe e ta congrega un grupo di studiante di musica di henter mundo cu ta bin Aruba pa atende e festival academico aki.

Evento di caliber internacional
E director artistico di ASF, e violinista Simon Gollo ta bisa cu esaki ta e “parti mas emocionante” pa conta, ya cu e festival aki ta conta cu un grupo di 22 academico di musica cu ta bin for di Suisa, Merca, Rusia Mexico, Colombia, Venezuela, Brasil, etc.. Nan presencia ta e miho y berdadero stapel di un evento internacional.

E aña aki, el a declara na Bon Dia Aruba, e festival tin un grupo di 62 studiante cu a bin for di mas cu 20 pais. Nan expectativa ta indica cu e grupo aki ta sigui crece tur aña keto bay. Nan ta akinan pa comparti un meta comun riba nos isla, esun di produci musica pa nos tin un bida mas harmonioso. “E echo cu nos ta comparti hunto den un festival, no ta un fiesta. E ta un oportunidad pa conoce otro hende y comparti cu artistanan cu ta toca hopi bon; y cu nos por comparti cu nan e experiencia aki”.

Segun Sr. Gollo, ASF a bira sin duda den un academia di summer cu ta uno competitivo cu cualkier otro academia manera esun di Aspec. E biaha aki Colombia tin mas participacion di studiantenan di musica, esaki danki na e presencia di Bogota Chamber Orchestra cu a haci su debut na Cas di Cultura ayera.

Caribe y cultura
E musico Suiso-Venezolano a bisa cu e profile di ASF no ta uno solamente di festival di musica manera esun cu ta tuma luga na Cartagena de India na Colombia, sino cu tambe nan a pusta riba e parti academico; pero nan obhetivo ta uno comun. “Nos kier duna e Caribe y e region di e mundo aki, un miho calidad cultural”.

E echo cu Aruba ta lider di un evento di e caliber aki ta uno masha satisfactorio; ya cu e ta genera un bon imagen y referencia internacional. Durante tres aña consecutivo cu Sr. Gollo a organisa e festival aki na Aruba, e ta haya cu esaki a nifica cu nunca mester bandona nan soño y obhetivo; a pesar di tur sorto di retonan grandi cu bo ta confronta. Un di nan ta esun financiero pero tambe esun di trece cambio riba e tradicion cultural di un comunidad.

Pero igualmente e festival aki ta contribui pa nos isla no profila su mes turisticamente pa su beyesa natural di nan beachnan, etc. pero tambe manera un destino cultural importante den nos region. Esaki ta e importancia di un evento academico y musical di e caliber aki, asina el a laga sa.