Cu sala di Cas di Cultura practicamente yen, e di 5 version di Aruba Symphony Festival & Academy (ASFA) a clausura. Pa cera cu broche di oro un festival cu a dura 10 dia, e director artistico di ASFA, Simon Gollo hunto cu e Aruba Symphony Festival Orchestra a presenta e symphony #7 den A mayor di Beethoven.
E tabata un espectaculo inolvidabel pa e publico presente. E tabata un oportunidad pa algun hende por experiencia pa prome biaha scucha un orkesta sinfonico toca. Cada aña ASFA ta creciendo mas y el a cuminsa bira un Aspen Music Festival den nos region. E concierto aki a conta cu presencia di Gobernador interino, Yvonne Lacle-Dirkszy tambe di minister Rudy Lampe.
El a bira un ocasion special pa por scucha henter un orkesta conforma pa studiantenan virtuoso di musica cu a bin di mas cu 15 pais rond mundo pa bin Aruba atende e master class di maestronan renombra internacionalmente . E biaha aki e festival a conta como un di su guest special na e director, Benjamin Zander kende ta un maestro musical renombra mundialmente.
Zander ta fundado y director di e orkesta Filharmonico di Boston. Tambe den cuadro di e festival aki a bira un privilegio di por a scucha Benjamin Zander na Aruba. E ta un di e oradonan mas famoso kende a duna un charla titula: The Art of Possibility. El a papia riba e aspecto di positivismo, optimismo y liderazgo. Un charla duna pa un persona di e caliber aki ta costa entre 50 mil pa 75 mil dollar, y el a hacie completamente gratis como un regalo pa e festival y pa Aruba, ya cu e tabata por nada pa tur publico.
For di dia 17 di juli ultimo e publico amante di musica sinfonico y clasico por a disfruta di un festival di caliber. Un festival cu a conta cu diferente scenario, no solamente na Cas di Cultura, sino tambe na Casibari Cafe, Paseo Herencia, Freewinds y Ritz Carlton Aruba, locual a yuda recrea y expande e ambiente musical aki rond di nos isla.
Igualmente ASFA a bira un bunita experiencia den e temporada di vakantie grandi pa nos muchanan na Aruba, caminda un grupo di 200 mucha a atende un ensayo di Aruba Symphony Festival Orchestra, conduci pa e director Simon Gollo. El a bira un actividad recreativo y educativo, caminda e muchanan a haya un splicacion riba kico ta un orkesta y tambe e muchanan a cera conoci cu e diferente instrumentonan musical. E muchanan a keda masha impresiona cu e ensayo cu nan por a mira na Cas di Cultura cu no solamente tabata na escenario di concierto, sino tambe e sede di nan academia musical.
