Pa e Aruba Symphony Festival & Academy por sigui e aña aki, e organisadonan ta pidi pa famianan na Aruba por ofrece hospedahe pa un periodo di dos siman na un of dos studiante of docente cu lo bin di afo pa e festival. E proyecto ta uno cu componentenan educativo pa loke ta trata musica. Famia cu ta tuma studiante of docente den nan cas ta haya entrada gratis pa e festival.

E aña aki Aruba Symphony Festival & Academy (ASFA) ta tene su di 5 edicion pero e aumento di gastonan ta asina halto cu ASFA ta haya su mes den un situacion cu e mester pidi ayudo atrobe di e comunidad Arubano.

Con abo por yuda? Un di e gastonan grandi di ASF ta hospedahe pa e studiante y maestronan. Si djis 30 famia ofrece di tuma un of dos studiante of maestro den nan cas durante e festival, esaki lo yuda ASF enormemente. Studiantenan ta yega Aruba dia 15 di juli y nan ta bolbe nan pais dia 28 di juli. Pa bo por bira un anfitrion, bo mester ta biba den cercania di Cas di Cultura, of di bo cas tin bon transporte publico pa yega Cas di Cultura.

Kico dunamento di hospedahe na un participante ta encera? Hospedahe ta encera cu e participante ta haya un cama, camber y baño limpi. E huesped mes mester drecha su cama y mantene su camber y baño limpi y na ordo. Si na algun ocasion e famia anfitrion kier invita e huesped pa come cu nan, esaki ta un decision di e famia anfitrion cu seguramente lo wordo aprecia y nos ta urgi e anfitrionnan mescla cu nan huesped mas hopi posibel. Pero e famia anfitrion no tin obligacion pa prepara cuminda pa e huesped. Mayoria di e participantenan lo ta di Merca, diferente estado, y varios lo ta originalmente di Latino America.

Dunamento di hospedahe na un musico hoben ta un experiencia hopi positivo pa e famia. E ta crea un oportunidad unico pa experencia un otro cultura y establece un amistad cu por dura bida largo. Ken sa, e huesped musico internacional algun dia por ta un musico di fama mundial. Pa mayoria di studiantenan, nan participacion den Aruba Symphony Festival ta un soño cu a bira realidad. Como nos ta biba riba un isla cu diversidad di cultura, nos tin diferente balor cultural pa comparti cu e musiconan hoben, incluso naturalmente nos cordialidad Arubiano cu ta conoci rond mundo. Un famia anfitrion por ta cualkier famia cu ta, no obstante si ta hoben of ‘no asina hoben’.

6 famia aña pasa a habri nan cas pa musico di region

Aña pasa seis famia a ricibi musico den nan cas. Tur seis famia a disfruta di e experiencia y nan a ofrece pa tuma musico e aña aki atrobe. Nos ta spera cu e aña aki, nos lo tin hopi mas.


 Como un gesto di aprecio, Aruba Symphony Festival lo regala cada famia anfitrion dos carchi pa e conciertonan inaugural y di clausura pa cual lo cobra pa entrada. E famianan anfitrion lo wordo reconoci tambe den e buki di programa oficial. Si abo kier sirbi como famia anfitrion pa Aruba Symphony Festival, por fabor contacta Johnny Croes na +297 592 3762 of via email: johnnycroes62@gmail.com.


 Ora bo yuda Aruba Symphony Festival corta su gastonan, bo ta yuda sigura cu e Festival ta keda Aruba.