Awe e atleta Nicole van der Velden ta exhibi e bandera nacional di nos pais Aruba, durante e ceremonia di apertura di e Weganan Olimpico 2016 cu ta tuma luga den e mahestuoso stadion di Maracana na Rio de Janeiro, Brasil. Riba su mes e evento aki ta un hecho historico, ya cu esaki ta e prome biaha cu e weganan aki ta wordo celebra riba teritorio Latino Americano.
Aruba su prome Weganan Olimpico
Un biaha mas Aruba como pais ta haci su participacion den e Weganan Olimpico, un historia cu a cuminsa na 1988 na Seoel, Sur Korea, dos aña despues cu nos pais a logra su Status Aparte. 28 aña a transcuri caba ora cu un delegacion di 12 persona entre delegadonan, coachnan y atletanan a bay representa pa prome biaha nos pais nobo den un olimpiada.
E aña ey, Aruba a participa den cinco disciplina deportivo: Judo, Landamento Sincronisa, boxeo, Atletismo, y te hasta un deporte masha singular den nos mundo deportivo: Schermen.
Sr. Hector “Chichi” Perez y Sr. Flavio “Chikito” Faneyte a forma parti di e prome delegacion aki. E prome como coach di Judo y e di dos como delegado di e disciplina deportivo aki. Judo ta un di e disciplina bandera hunto cu lantamento di Aruba su participacion deportivo den e weganan aki.
Presidente di Comite Olimpico Arubano (COA) tabata Duli Tromp (d.f.m.) kende e tempo aya tabata bisti e pechi di Mediador di Gobierno tambe. E tempo ey, Sr. Carlos Bislik (d.f.m.) tabata su secretario, y durante un eleccion di presidente di COA, Sr. Bislik tabata bon cualifica pa e posicion aki. Sr. Perez ta recorda cu el a puntra Sr. Bislik dicon e no ta postula su mes como presidente, pero den un acto di noblesa y reconocimento el a contesta.: “Mi no ta hacie, pasobra Duli ta haciendo un bon trabou”.
E aña ey nan a bay cu e atleta Victor “Vito” Maduro den Judo; Evelyne Farrell y Cornelia Melis den Atletismo; Hubert Wester y Jeffrey Nedd den Boxeo y Austin Thomas den Schermen. Y den landamento sincronisa, Yvett Heinze-Thuis kende awendia ta dokter y Roswitha Lopez. Mientras cu nan delegado tabata Sra. Nicole Hoevertsz, kende actualmente ta Secretaria General di Comite Olimpico Arubano (COA).
Encuanto e proceso di seleccion di antes compara cu awendia, Sr. Perez a prefera di abstene su mes di bisa algo, ya cu e no ta mucho na altura di e sistema cu a wordo uza. Den nan tempo por lo menos pa Judo, nan mester bin cu proceso di seleccion a base di competencianan entre e judokanan di Aruba. E ta considera cu antes e judokanan tabata hopi mas cu awor, ya cu e ta haya cu no tin mucho atleta den e deporte aki. “Aworaki nan ta piki nan cu man. E tempo aya bo mester di bringa y gana bo puesto dor di competi y gana”, el a bisa.
Pa selecta e atletanan cu ta participa awe na e Weganan Olimpico di Rio 2016 e proceso aki ta bin canando for di dos aña pasa. For di 21 atleta a wordo selecta 7 atleta cu lo participa den diferente disciplina deportivo. Entre nan atletanan di landamento, Allyson Ponson y Mikel Schreuders. E atleta di taekwondo Monica Pimentel. E atleta Jayme Mata den Judo. E atletanan Philipine van Aanholt, Nicole van der Velden, y Thijs Visser di sailing.
Preparacion y ambiente
Sr. Faneyte a papia riba e preparacion di nan atletanan den e prome olimpiada cu Aruba a participa como pais. El a bisa cu e atleta Victor “Vito” Maduro a wordo selecta a base di competencia. Pero despues cu el a resulta den su grupo como e judoka mas destaca, e mester a bay tambe na diferente competencia den nos region. Un motibo tabata pa wak si e por clasifica y mantene su posicion, pero alabes e tabata sirbi como training p’e.
E tempo aya e situacion tabata uno masha diferente cu awendia. Tabatin cierto incertidumbre debi cu apenas Aruba tabatin dos aña canando su caminda como pais autonomo den Reino Hulandes. Sr. Perez ta recorda cu e ambiente cu tabata reina den e prome delegacion di Aruba den un Weganan Olimpico, tabata uno bon y positivo, pero hopi humilde.
“Nos tabata un tiki desapunta pasobra prome cos cu nan a bisa nos ta cu nan ta haya e training paknan, pero bosonan tin cu entrega nan bek”, Sr. Perez a bisa. Cu un sonrisa riba su cara, e ta bisa cu e exigencia aki no a cay den bon tera pasobra tur e paisnan presente a keda cu nan training park nechi, mientras cu nan mester entrega esunnan di nan bek. “Nos a bay contento pasobra nos a bay representa nos pais, pero esaki tabata e unico cos cu nos no a haya corecto!”, el a bisa.
E aña aki e delegacion cu actualmente ta presenta nos pais den e Weganan Olimpico di Rio 2016 a bay bon ekipa y bon basha. E compania Totto a traha nan uniform deportivo bunita, moderno y di bon calidad. E aña aki te hasta un diseñador a wordo introduci pa diseña e uniform oficial di e delegacion den persona di Sra. Magali Maduro, kende for di aña 2004 ta e diseñador oficial di COA, hunto cu e cosedo di e uniform, Manish y Archie Mirchandani di H.K. Tailor.
Sr. Faneyte a agrega cu nan tabata sinti nan mes orguyoso di a skirbi e capitulo historico aki di ta e prome delegacion di Aruba cu su propio bandera cu a bay den un Wega Olimpico. “E entusiasmo di nos como atleta, pero tambe di e dirigentenan tabata grandi. Mi ta sigur cu mayoria di e pueblo di Aruba a acepta esey y tabata un orguyo”, el a bisa.
Sur Korea
Recientemente e delegacion Arubano a biaha pa e Weganan Olimpico di Rio de Janeiro 2016. Brasil ta un pais di habla Portugues relativamente cerca di nos isla, unda awe ta inicia e celebracion deportivo mas grandi na mundo. 28 aña pasa un delegacion Arubiano tambe a prepara nan maleta, pero e biaha ey pa bay un pais leu di nos region cu otro cultura y lenga masha straño pa nos hendenan.
Sr. Perez a bisa cu e biahe cu nan a realisa tabata masha pisa. Nan mester bula hopi ora prome cu nan a yega na Hapon unda nan a bay training. E itinerario tabata: Aruba – Miami – Los Angeles – Hawaii – Hapon y finalmente Sur Korea. El a relata cu e choke cultural tabata tremendo, tanto na Hapon unda nan a bay training un par di siman prome y despues na Korea, un pais dividi entre Nort Korea di regimen Comunista y Sur Korea di regimen democratico.
Como representante di Judo nos atleta “Vito” Maduro a pasa den un training masha exigente. “Nan no tabata duna un step dilanti sin sa pa kico nan tabata hacie. Nan sistema tabata masha adelanta”, Ssr. Perez a bisa. Ademas tur producto tabata ya sea Hapones of Sur Koreano, solamente nan tabata wak e productonan Mericano como algo masha exotico den e vitrinanan.
Anecdota
Un anecdota cu Sr. Perez ta conta cu agrado ta cu na Hapon tres canal di television tabata graba nan constantemente riba kico nan tabata come, kico nan tabata cumpra, con nan tabata training, con nan tabata drumi y lanta, etc. E tabata manera un reality show caminda un di e canal aki a keda como e canal number uno di sintonia na Hapon.
Mientras cu na Sur Korea e ta corda un anecdota cu e no por lubida nunca, ora cu nos atleta mester core un pida cu e flambeu olimpico.
Nan a yega un localidad fronteriso caminda tur hende tabata para cu bandera di Aruba den nan man, sin sa na unda Aruba ta keda. Mientras cu nos atleta tabata wardando pa ricibi e flambeu olimpico, Sr. Perez a haya urgencia pa bay w.c. El a puntra un hende cu seña unda e por bay w.c. pa haci su necesidad fisiologico. Anto e persona a señala cu patras di un sero chikito supuestamente tabatin un w.c.
Ora cu Sr. Perez a subi e sero el a bin ripara cu den otro banda tabatin e frontera di Nort Korea. “Mi a haya mi cu un ehercito di guera bon arma di pia te cabes”, e ta relata cu masha harimento. Aparentemente esaki tabata e w.c. pa e Sur Koreanonan.
Apart di e anecdota aki, Sr. Perez a bisa cu niun momento nan por sinti un tension producto di e diferencia politico entre un pais dividi, entre sur y noord cu dos regimen diferente: Comunista y Democratico.
Solamente e medida di siguridad tabata pisa cu ta algo cu ta sosode den tur olimpiada specialmente despues di e tristo acontecimento cu a tuma luga na Munich (Alemania) na aña 1972, caminda militante di Organisacion di Liberacion di Palestina (OLP) a atenta contra e atletanan di Israel.
