Aruba su estado di derecho ta consisti di trias politica unda tin separacion di 3 poder cu ta inclui e poder Ehecutivo (Gobierno di Aruba), poder Legislativo (Parlamento di Aruba) y poder Hudicial (Corte di Aruba y HOF). E cancer maligno di corupcion a penetra den 2 di e 3 organo mas halto den nos estado di derecho (Rechtsstaat) na Aruba.

Ora ta papia di corupcion, ta papia di e gran enemigo di un sociedad, di e democracia y di nos estado di derecho na Aruba, na unda cu a draai un organisacion criminal den cas di gobernacion di Aruba (Cocolishi) pa labamento di placa, aceptacion di soborno, abuso di poder pa bendemento di tereno di pueblo, malversacion di placa di Parlamento di Aruba y falsificacion di documento te na estafa. Asina ey a pone un mancha scur den e politica Arubiano.

Corupcion den poder ehecutivo na Aruba (Gobierno di Aruba)
 Aruba tin record den reino di politiconan condena pa hechonan castigable, incluyendo ex-minister di Finanzas Tico Croes di gabinete di Henny Eman III pa loke tabata trata Fondo di Desaroyo Nobo San Nicolas su sentencia (Onherroepelijk).

Ex-minister Paul Croes, cu tabata minister di Hubentud, Asuntonan Social y Labor den Gabinete Mike Eman II, tambe a keda condena penalmente den e caso IBIS pa diferente delito manera labamento di placa, participacion den un organisacion criminal, acepta y pidi soborno y abuso di su funcion. Paul Croes su sentencia ta tambe ta onherroepelijk y na e momentonan aki ta pagando su debe cu husticia di Aruba na KIA.

Benny Sevinger, parlamentario y ex-minister di Infrastructura, Integracion y Medio Ambiente den Gabinete Mike Eman I y II, ken a keda condena den corte di prome instancia y HOF den e caso Avestruz recientemente pa otorgamento di tereno di gobierno, mal uso di su fundacion Curason Berde, estafa di pais Aruba y aceptacion di soborno.

Corupcion den poder legislativo na Aruba (Parlamento di Aruba)
 Alan Howell, ken tabata e sospechoso principal di e caso Diamante y tabata fungi como vice-presidente di Parlamento di Aruba, tambe a keda condena pa malversacion di fondo y falsificacion di documento pa corte di prome instancia. Aworaki su sentencia ta den apelacion.

Conhuntamente cu Howell tin Jacqueline van Putten, ken tabata candidato riba lista y tabata tesorera di e fundacion di fraccion di partido POR den Parlamento di Aruba yama Blue is Love Foundation. Den sentencia ta indica cu Van Putten a enrikece su mes cu ‘Sinterklaas’ bonus cu e no tabatin derecho riba dje. Van Putten no a apela su sentencia, loke ta haci su condena onherroepelijk.

Poder Hudicial na Aruba (OM y corte di prome instancia y HOF)
 Politiconan y cierto plataformanan di media ta critica y ta trece dilanti acusacionnan hopi serio riba Ministerio Publico cu ta parti di e sistema Hudicial. Como muestra, e declaracion reciente di Sevinger, ken saliendo di su caso di HOF a señala cu “si tin un corupcion, esey ta Ministerio Publico, corupto Ministerio Publico ta y mi por prueba esey, den mi caso esaki sigur ta conta como un persecucion politico y cu un grupo di hende ta dicidi cu nos ta bay caba cu Benny Sevinger su bida.” Purbando asina di erosiona e confiansa publico den sistema hudicial.

E criticanan cu ta busca ta mina e independencia hudicial por destabilisa un estado di derecho. E independencia hudicial ta esencial pa un democracia funcional y e atakenan riba e independencia aki por yega na un sistema hudicial debilita.

Ministerio Publico ta mandando un señal fuerte
Landsrecherche di Aruba, cu ta traha independientemente y bao autoridad di Procurador General, ta investiga desde 1993 comportacion posiblemente castigabel di (semi) ambtenaarnan. Un parti importante di e tarea aki ta pa bringa corupcion. Corupcion ta ataca un pilar importante di democracia, esta, e confianza den gobierno. Un ciudadano mester por confia cu ta trata cuidadosamente cu placa publico. Un ciudadano mester sa cu ley ta conta pa un y tur y cu corupcion ta inaceptable.

Den esaki, por recorda e palabranan di e fiscal Patrick van der Biezen ken den mesun caso aki di Avestruz a menciona cu “Ministerio Publico tin e tarea y obligacion pa ley pa nan aplica ley penal na momento cu tin persona cu ta comete un hecho castigabel, muy den particular, mandatarionan di Pais Aruba cu ta haci su mes culpabel di entre otro, ricibi placa y otro regalonan a cambio di fabornan. Esey ta algo hopi grave y mester reacciona riba esey, mester persigui e personanan aki y trece e caso dilanti. E sentencia di awe ta confirma tambe cu e sospecho cu nos tabatin for di principio cu a ser confirma caba den prome instancia, awe atrobe a ser reconfirma door di apelacion cu e normanan cu nos ley penal ta dicidi na momento cu bay den pugna cune vooral como mandatario ta hopi serio.”

Politiconan sospechoso di husticia na e momentonan aki
Otmar Oduber , ex-minister di Infrastructura y Medio Ambiente di Gabinete Wever-Croes I, na momentonan aki ta sospechoso den caso Flamingo relaciona cu otorgamento di tereno.

Chris Romero, ex-minister di Transporte y Sector Primario di Gabinete Wever-Croes I, tambe ta sospechoso penal den e caso Kwihi pa algun contract di servicio otorga den su funcion como minister.

Guilfred Besaril, ex-minister plenipotenciario di Gabinete Wever-Croes II na Hulanda, ta sospecha di malversacion di placa di Pais Aruba durante biahenan di negoshi, Emiti ordennan di pago cu beneficio personal y A realisa gastonan a costo di Pais Aruba.

Nota di redaccion:
Na Aruba: Na e momento aki tin 5 politico condena penal pa corupcion.

Partido AVP: Na e momento aki tin 3 condena pa corupcion.

Partido POR: Na e momento aki tin 2 politico condena pa corupcion y 1 sospechoso di husticia na e momento aki den caso Flamingo.

Partido MEP: Tin 2 sospechoso di husticia na e momento aki, un cu ta den caso Kwihi e ex-minister Chris Romero y ex-minister plenipotenciario Guilfred Besaril den e caso Tulipan.

Na Corsou: Tin 2 politico condena pa corupcion y 1 pa asesinato di Helmin Wiels.

Na Sint Maarten: Tin 2 condena na e momento aki pa corupcion.