Ayera Gobierno a ricibi e grato noticia for di New York cu e compania di rating FITCH a cambia e perspectiva di Aruba di BB-negativo pa BB-stabil. Algun siman atras Standard & Poor’s tambe a adapta e rating di BBB-negativo pa BBB-stabil. Gobierno di Aruba ta sumamente satisfecho cu e resultadonan aki,pasobra ambos compania di rating ta confirma cu apesar di e golpinan severo riba economia mundial den e prome aña di COVID, e economia di Aruba a sa di wanta e impacto enorme di COVID. Aruba su economia a demostra su resiliencia y nos tin un fundeshi fuerte riba cual por sigui traha pa recupera di e sla economico cu COVID ta trece cune.
Reaccion rapido y acuerdo cu Hulanda a yuda Aruba
Un aña pasa Fitch a downgrade Aruba su rating cu dos notch (BBB- a bira BB) y a pone un expectativa negativo pa nos Pais, debi na e hecho cu Aruba ta depende grandemente di turismo y cu ta hustamente turismo ta locual mundialmente lo sinti e efecto negativo di e medidanan pa frena e pandemia. Den su rapport FITCH ta mustra cu den e prome aña di COVID e Gobierno di Aruba a reacciona rapido, eficiente y a traha den forma pragmatico hunto cu Reino Hulandes pa yega na areglonan di cooperacion cu a sostene Aruba su economia. Esakinan a duna resultado cu FITCH ta reconoce y e hecho cu Aruba ta bay sigui ricibi e sosten di Hulanda, ta duna FITCH e confiansa pa haci cambio na Aruba su rating di negativo pa stabil.
Un noticia positivo pa Aruba
E cambio di rating aki di FITCH ta un noticia importante pa Aruba. E ta significa cu inversionistanan internacional y local por ta trankilo cu Aruba apesar di e sla di COVID na nos economia ta keda un Pais sigur y factibel pa inversion. Gobierno tambe ta beneficia di un bon rating, ya cu un bon rating ta yuda controla e tasa di interes riba e debe nacional. Si e tasa bay for di man e gastonan di Gobierno ta subi automaticamente. Pa e motibo aki durante e aña cu a pasa Gobierno a atende cu tur inversionista y tur rating agencies na un forma pro-activo y transparente brindando na tur momento informacion pa nan ta na altura di locual ta pasando y e plannan cu Aruba a bin ta desaroya. Minister Xiomara Maduro ta gradici FITCH ratings, Departamento di Financia y tur persona y instancia cu a colabora pa haci e evaluacion uno postivo pa Aruba.
