Ayera atardi un grupo di Argentino turista cu a keda pega na Aruba a bay na Parlamento pa pidi cualkier atencion y ayudo di gobierno di Aruba pa asina nan por logra regla un manera pa bay bek nan pais despues di nan vakantie riba nos isla. Despues cu a papia cu minister Xiomara Ruiz-Maduro (MEP), nan ta sinti mas trankil cu ta trahando riba un solucion pa nan den conhunto cu embahada Argentino na Venezuela.

E grupo di mas cu 20 persona Argentino bou cual tin tanto hoben como hende grandi a keda pega na Aruba despues cu nan tabata sperando pa nan vuelo via Panama cu aerolinea Copa Airlines. Na Parlamento nan a conta con antayera tabata nan ultimo chens pa sali for di Aruba, pero Copa no a laga niun di nan subi e avion cu lo a bay via Panama, pa asina conecta cu buelo humanitario cu lo yega na nan pais. E rason dicon e grupo aki a haci un apelacion na gobierno di Aruba pa duna nan un sosten, ta pasobra tin di nan cu tin edad di 60 bay ariba, cu un par sufriendo di malesanan cronico. E grupo aki ta boga pa gobierno tuma contacto via canalnan diplomatico, cu e embahada di Argentina na Venezuela pa asina bin cu un solucion. Nan no tin expectativa cu gobierno no lo yuda nan cu placa ni tampoco nan kier esey, solamente un atencion pa nan no sinti nan so den e temporada dificil aki.

‘Aruba su cordialidad ta visibel hasta den crisis’

Despues cu prensa a pasa cerca e personanan aki dilanti Parlamento, e grupo a bay para dilanti entrada di prensa na Bestuurskantoor pa wak si ta haya algun atencion. Mariza Garcia, un residente di basta tempo riba nos isla cu ta apoyando e grupo aki di su paisanonan, a conta Bon Dia cu despues di para un rato a mira minister Maduro riba balcon di Bestuurskantoor. Eventualmente a yama 2 di nan pa drenta pa asina nan papia. Ya caba e grupo tabatin un lista prepara cu tur e nombernan, condicion medico y number di identidad di e personanan pega na Aruba, pa asina por coordina cu sea ATA of Directie Buitenlandse Betrekkingen. Garcia a bisa cu e grupo a haya e atencion di e minister uno sumamente amabel, y cu e grupo a expresa cu hasta den crisis memey e situacion cu Covid-19, ‘Aruba su cordialidad ta sigui ta visibel’.

Tabatin persona riba medionan social cu a critica e grupo di persona aki pasobra nan tabata por a sa cu por a sali te na cierto dia for di Aruba. Sinembargo, no t’asina cu nan a sinta warda djis pa nan por keda. “Hopi di nos a bin cu un vakantie di acuerdo cu loke nos salario na nos pais ta permiti nos, kiermen cu nos no lo por keda permanentemente. Nos a bin como turista”, un di e personanan pega riba nos isla a bisa. Anteriormente durante un conferencia di gobierno Ronella Tjin Asjoe-Croes, CEO di ATA, a anuncia cu lo tuma contacto cu e embahada di nan pais pa e grupo aki. Asina ATA a encarga su mes pa purba regla estadia mas economico di e grupo cual ta kedando na diferente luga rond nos isla. Pero aworaki cu a haya un contacto tambe den ATA, Gleny Tromp, cu lo fungi como e contacto entre Aruba y e embahada cu lo por bay percura pa e Argentinonan yega cas.

Tijn Asjoe-Croes a indica anteriormente cu ta pendiente informacion di Migracion Aruba pa haya sa cuanto turista tin ainda riba nos isla, pero cu no tin un deadline fiha pa e turistanan aki bandona nos isla. Tin vuelo ainda saliendo pa Merca awe te mañan, y pa Hulanda te 31 di maart. Sinembargo pa region di Latino America no tin conexion, mirando cu tur vuelo via Panama y Colombia a stop.