Nos ta yegando fin di april y no ta riparando mucho ainda di campaña electoral. Y ta ken ta haya su falta?

Nos no sa kico ta e motibo cu e aña aki campaña electoral no ta manera den añanan anterior, unda a cuminsa mas tempran, specialmente e partido den gobierno, presentando un abundancia di bandera, sticker, evento cu cuminda y bebida, borchi di propaganda grandi banda di caminda, etc. Awor, apenas nos a mira algun evento di inicio di campaña cu no a hala tanto atencion tampoco. Averiguando e motibonan pakico ta cuminsa mas laat den aña, nos por imagina algun cos.

Na prome luga nos tin e impresion cu e fondonan pa campaña no ta di gaba. Esey ta conta probablemente pa tur partido, pero menos pa e partido den gobierno. Di tur manera nan tin acceso na e recursonan gubernamental, den forma di oficina, hende y ekipo, manera vehiculo. Loke den nan caso tambe por ta menos ta e recursonan financiero, cu pa un parti considerabel lo a muda hunto cu e ex ministro di Turismo, cu no tabata hala voto so, sino tambe recurso financiero. Asina ta, menos placa pa borchi y bandera grandi e aña aki.

Pero e otro partidonan lo tin menos recurso ainda pa hiba campaña na grandi, cu un monton di material cu mester bin di afo. Nos economia no ta di canta gloria y e fuente di custumber, e empresario cu su cheque grandi o chikito, no t’ey manera den otro campañanan. Y tur esaki ta haci necesario pa busca manera alternativo pa yega na e ciudadano. Pasobra finalmente esey ta e meta: con pa convence e persona cu e miho manera ta pa vota pa bo partido. Kico ta e opcionnan anto? Nos ta mira aki, pero tambe den exterior, cu ta bin un enfasis mas riba e metodo tradicional di e bishita na cas y den bario.

Algo malo cu esey? No, al contrario. E no ta costa tanto y por lo menos ta duna e ciudadano oportunidad di haci pregunta y duna su banda di e medaya. Un di e esunnan cu pa aparentemente ta haci uzo di esaki ta nos prome ministro, cu tin bastante tempo caba ta dedica amplio atencion na bishita hende na nan cas y den nan bario. E accion di pone luz nobo den bario tambe ta parti di esaki. Naturalmente cu no ta partido ta paga esaki; tur esey ta sucede cu placa cu ta sali for di nos cartera como impuesto y como pago na Elmar cu ta maneha y mantene e sistema di iluminacion publico.

En realidad loke nos ministro presidente ta gaba cu ne ta un servicio riba cual nos tin simplemente derecho como ciudadano y cu ta trabao di Elmar pa percura pa tin iluminacion drechi den tur bario y riba tur caminda. Pero no, awor ta ‘bende’ esaki como un fabor politico: si bo comporta bo mes nechi y declara bo mes fiel na e partido den gobierno… Cu otro palabra, votado di otro partido politico no por haya iluminacion den nan parti di e bario!? Tin un oficina unda bo por acudi pa haya luz instala si bo cas a keda den un parti scur di e bario? Nos a comprende di Elmar algun tempo pasa caba cu nan no ta responsabel pa indica unda iluminacion adicional mester bin. Esey lo ta un asunto di ‘gobierno’…

Gobierno tin un oficina special unda bo por solicita pa haya luz? Unda e ta situa? Ki documento bo mester trece? Por ta cu bo mester simplemente yama despacho di prome ministro pa solicita su bishita na bo bario? ‘Get the picture’? Unda e entrada neutral pa esunnan no envolvi cu e partido ta?

Pero enfin, ban mira henter e asunto aki di banda positivo, e banda di oportunidad. Ta hopi menos costoso pa organisa reunion di e partidonan individual mes, pero tambe encuentro di debate unda tur partido por igual ta haya oportunidad pa presenta nan pensamento, con nan tin pensa di bay goberna. Nos tambe por tin ‘townhall meeting’ unda e ciudadano por topa directamente cu e politiconan, den un ambiente unda e politico no ta papia solamente cu esunnan mas fiel, pero cu otro ciudadano cu nan por trata di convence.

Ironicamente e caso di corupcion bao investigacion actualmente a pone hopi hende realisa, cu politica no ta cuestion di cana ciegamente tras di un bandera di cierto color, y cu ningun bandera ta garantisa gobernacion drechi sin mas. Esaki ta e oportunidad excelente pa nos papia, discuti, debati, diferencia di opinion, pero semper cu respet pa otro. Esaki ta e oportunidad unico pa para keto y reflexiona kico a hiba e luga aki cu nos ta yama cas unda e ta awe, unda nos no por djis cumpli como ciudadano y haya loke nos tin derecho di haya, sin cu tur cos ta mara na faboritismo politico.

Ban celebra eleccion manera un pueblo civilisa, sin campaña costoso cu nos mes ta paga despues. Ken no por sin pechi, T-shirt, sticker, bandera, musica, cuminda y bebida, pa forma su opinion?