Aruba sin ‘aanwijzing’… Pero cu hopi trabao pa haci…

Nos prome ministro a bay Hulanda y a bolbe cu un resultado, uno preliminar, mester bisa, pero toch. E mes tambe a mira lo relativo di e exito y a expresa cu falta hopi pa haci ainda. Den esey nos por ta di acuerdo, y den varios sentido. Na prome lugar caba e tema financiero, riba su mes importante pero tambe pa tur otro, ya cu limitacion di recurso ta defini pa tur ministerio te unda nan por yega cu nan plannan.

Loke a logra inmediatamente ta cu pa 2019 ya no mester coregi presupuesto pa incorpora e gastonan haci e aña aki cu e Plan di Crisis Social, pero pa otro aña si lo mester conta esakinan hunto cu e gastonan, halto ainda, di gobierno. Ta importante pa haya sa kico lo ta e consecuencianan pa e personanan contrata den e plan aki. Gobierno lo continua cu e programa manera e ta planea? O ta cuminsa limita esaki na loke ta parce lo mas necesario na e momento aki? Preguntanan cu lo mester haya contesta den e debate riba presupuesto proximamente.

Tambe lo mester test e presupuesto riba su nivel di realismo pa loke ta e cantidad grandi di dividend extra cu gobierno kier saca di e entidadnan legal liga na gobernacion. Cu gobierno ta desea di saca mas placa di e empresa y otro formanan legal aki ta di comprende, sin embargo e pregunta ta te unda ta responsable pa saca placa di nan sin cu nan operacion sano ta bin na peligro. Ya caba nos a scucha critica pa saca placa extra di Aruba Tourism Authority, cu por ta den detrimento di inversion den mercadeo. Igualmente nos a señala e empresanan manera WEB, Setar, AAA NV y otronan cu mester dedica nan recursonan na percura pa un balance entre capital fia y propio capital.

Y ta aki ta unda nos ta topa cu un di e problemanan mas fundamental di e falta di transparencia den nos sistema di gobernacion: con nos por opina na un manera drechi si e ‘handel en wandel’ di e entidadnan aki pa un gran parti ta un misterio pa e ciudadano? Si no tin informacion, nos mester kere anto cu por ehemplo e defensa inutil di monopolio di Setar ta pa mantene entrada pa gobierno como dividendo, lagando nos sin infrastructura di glassfiber? Gobierno ta bay y gobierno ta bin, pero realmente nos ta mira algo cambiando den e cosnan aki? Despues di dos aña den gobierno ta poco e avancenan cu nos por señala den desaroya un modelo mas solido y transparente pa e entidadnan liga na gobierno aki.

Y tin otro aspecto tambe cu cual mester tene cuenta, y esey ta cu cada tanto tempo nos ta haya informacion cu no ta mustra positivo pa e actual gobierno, pero cu ta cosnan cu tur gobierno tabata haci. No cu esey ta un excusa pa sigui opera asina, pero ta dificil como prensa responsable si no tin un cuadro general di informacion accesible pa prensa y publico. Ehemplo di esaki ta e custumber, continua te awe, di e contratacion di cierto bufete di abogado so pa e casonan grandi, y den e caso actual en berdad ta trata famia.

Nos a mira den e siman cu a caba aki un defensa extenso di nos prome ministro contra e partido opositor extraparlamentario, cu a cuestiona nepotismo y falta di transparencia di e gobierno aki riba diferente tereno. Nos no ta bay den e debate aki, pero con a para cu e casonan cu nos mes a señala, manera e tres puestonan di comisario cu e asesor cu a bira parlamentario tabatin como shopkeeper pa su ministro na tres empresa estatal? Y, de paso, con a para cu e tresnan di e ex-partner di e mesun ministro? Nos por ripiti e pregunta atrobe: ta hende drechi y confiable a caba na Aruba cu no por haya hende pa yena e puestonan aki? O ta simplemente confirma cu nada no a cambia y cu ta keda cultiva e custumbernan maligno aki? Si ta asina, anto e partido opositor tin razon… En todo caso, no ta suficiente pa pone bon intencion den programa di gobernacion, si seguidamente ta haci net lo contrario.

Tin un motibo mas, sin embargo, pa nos trece e cosnan aki dilanti. Ta e aspectonan mahos aki, talvez di casonan chikito cu no ta mustra asina relevante, ta cuminsa hunga un papel nefasto na momento cu gobierno ta enfrenta otro problema, cu riba nan mes ta di mucho mas peso. Ora por ehemplo gobierno mester enfrenta e sindicatonan cu ta representa empleado publico, teniendo razon segun nos opinion, cu no tin placa pa dedica na salario di empleado publico, ta e practica di patronahe politico y di nepotismo ta yuda crea un ambiente negativo, sin cu esey ta necesario, basta cu gobierno cumpli cu loke nan mes ta predica, loke nos no ta mira.

Loke nos kier enfatisa aki ta cu, si gobierno kier pa nan esfuerso pa canalisa finanzas publico den un bon rumbo, ta importante pa pone bon atencion riba e aspectonan aparentemente menos importante aki, cu na e momento menos oportuno ta bin di atras pa morde. Tin hopi trabao pa haci, y no solamente den finanzas.