Ayera atardi, ATA hunto cu minister di Turismo Dangui Oduber, EPI y Qredits a duna un conferencia di prensa pa duna di conoce e programa Aruba Signature Experiences.

Segun Ronella Croes, CEO di ATA, pa oficina di turismo for di aña 2014 nan a drenta den un etapa conforme na nan plan di maneho cu dos business plan cu tin tendencia mundial y tambe un feedback entre nan stakeholders cu a conduci na un evolucion di ATA.

For di e momento ey, nan a priorisa un ATA cu ta duna mas atencion na nan desaroyo di producto turistico na un manera duradero, conforma na esey nan a haci diferente accionnan tumando diferente pasonan, entre otro, a conduci na un estudio di capacidad di carga y un otro estudio cu basicamente ta defini ki tipo di segmento of niche Aruba por introduci cu ta cuadra cu desaroyo duradero y tambe kico mas por haci y kico esey por nifica pa Aruba.

Un desaroyo turistico duradero ta uno unda tin balans entre cuatro aspecto: contribucion economico pa medio di turismo, proteccion y conservacion di nos medio ambiente incluyendo naturalesa, un otro punto ta cu tur cos mester sirbi e calidad di bida di residentenan y di ultimo tur cos mester ta tambe dirigi na un experiencia di calidad pa nos bishitantenan.

E cuatro componente aki ta forma parti di lo cual nan a introduci na 2014 cu ta un modelo di desaroyo turistico cu nan ta cualifica como uno di ‘High value load impact’, e high value pa medio di contribucion economico, high value pa residentenan na unda akinan no mester pensa den contexto monetario so sino pa nan biba feliz cu bienestar pa un y tur, tambe un load impact pa recursonan y di ultimo experiencia di calidad di bishitantenan mester ta uno di halto balor pa nan pero tambe tumando na cuenta cu esaki mester tin un impacto abou riba recursonan natural di e isla.

Aruba Signature Experiences ta un programa cu ta cuadra cu e vision aki segun Croes a sigura y por medio di e colaboracion entre ATA hunto cu minister di Turismo Dangui Oduber, EPI y Qredits nan lo duna un plataforma y oportunidad pa esunnan cu tin interes pa participa y tin ganancia den sentido di training y tambe educacion.

E programa aki manera Croes a menciona lo tin e intencion cu bao e plataforma aki lo scoge e cinco miho idea di negoshi y plannan di maneho cu ta cuadra cu diferente criterio na unda cu lo bay evalua y e negoshinan aki lo wordo beneficia di ATA cu lo duna guia y training personalisa na nan, ademas lo haci un campaña di promocion pa Aruba Signature Experiences bao di e bishitantenan tambe.

E balor cu ATA ta pone riba mesa pa e programa aki e tambe por duna un balor como comerciante di te cu 20.000 florin di loke e entrepreneur por wordo beneficia di conocemento, nan canalnan di promocion etc.

Croes a sigura cu nan no kier cu e programa aki solamente t’ey disponibel pa e cinco compania cu miho lo sali for di tur esunnan cu lo participa, nan kier pa mundo comercial y tambe NGO pa ta consciente di e importancia di desaroyo di e niche y cua di nan kier priorisa, cua di nan ta cuadra den e plan di estudio di capacidad di carga pero tambe economicamente tin sentido pa Aruba.

Di mesun manera, nan a lansa un par di guianan (wak potret referencia) di segmentonan cu nan ta priorisa, un cu ta disponibel pa segmento romance, actividadnan activo cu nivel di impacto abou, ademas di segmento di turismo di bienestar, nan tur ta obtenibel riba www.aruba.com/registra.

Oliver Vieira, ken ta branch manager di Qredits Aruba, a expresa cu nan ta un compania cu tin cuater aña dunando financiamento hunto cu coaching y educacion, pa su persona e proyecto aki ta algo hopi bon pa wak tur e motivacion su tras cu tur partners tin pa por brinda oportunidad na entrepreneur di Aruba.

Nan rol den esaki ta pa duna apoyo den sentido cu nan tin nan Small Business Academy cu EPI lo opera caminda cu diferente entrepreneur por bay den un programa di dies luna y lo wordo ekipa cu hermentnan necesario pa tin un negoshi exitoso.

“Di nos parti nos ta bay sigura cu nos por ofrece material y EPI lo bay regula e calidad di programa”, Vieira a bisa.

Qredits lo considera un financiamento na entrepreneur cu ta bay pasa den e programa y via e proceso di aplicacion nan por pasa over na e siguiente paso cu ta ATA caminda nan lo haya e apoyo den diferente area di mercado of actividadnan. Esaki no ta limita na empresarionan nobo segun loke Vieira a menciona, na esunnan existente tambe y nan por aplica directamente cerca Qredits, sin necesidad di pasa via nan Small Business Academy.

Di su parti, Ryan Maduro director di EPI a expresa cu desde un par di añanan Qredits y EPI a bin trahando hunto den e programa “Be your own boss” na unda cu esey ta duna na tur empresario cu tin gana di siña con ta un entrepreneur y e conocemento necesario pa nan por haci di esey un realidad.

Nan como EPI lo duna conocemento mas profundo na entrepreneur cu ta bay forma parti den e proyecto den sentido cu nan lo maneha e Small Business Academy cu ta un programa mas profundo cu Be Your Own Boss y ta mara na e proyecto di loke ATA ta ofrece na e momentonan aki.

E programa lo core den dies siman y lesnan lo tuma luga dos biaha pa siman na unda cu ta wordo ofreci di manera online y presencial, e registracion a cuminsa ayera diahuebs y programa mes lo cuminsa dia 12 di october.

Minister di Turismo, Dangui Oduber a splica cu esaki ta forma un parti integral di e normanan y prioridadnan cu lo tin den su maneho den e segundo termino cu a caba di cuminsa, e cual ta nifica cu lo bay enfoca riba e perfil di turista di “High Value Low Impact Tourism”, e plannan di desaroyo di destinacionnan tambe lo bay refleha esaki, esaki ta e turistanan cu ta gana mas di 150 mil dollar pa aña y alabes ta respeta nos naturalesa y balornan cultural.