ARUBA SCHOLARSHIP FOUNDATION (ASF) ta otorga beca atrobe na tur studiante cu ke sigui un estudio den exterior na un instituto di enseñansa superior. E aña aki ta e di 30 aña cu ASF ta yuda financia estudio di e studiantenannan.

E interesadonan por conecta cu facebook pagina di Aruba Scholarship Foundation y e por lesa informacion tocante ASF en general y e rekisitonan necesario pa un candidato bin na remarca pa un beca. Pa informacion adicional por email ASF, pa medio di Info@arubascholarships.com y pa un di e miembronan Etley Lasten, Brian Marchena of Hector Kolfin.

Den caso cu e studiante ta interesa pa aplica pa un beca di ASF, lo ta bon pa e expresa e deseo ey pa medio di email den cual e ta pone su nombernan completo y tambe su emailadres, number di telefon, si e ta interesa den un beca di ASF.

E siguiente stap ta pa e studiante download e formulario for di ASF su facebook pagina y entrega esaki completamente y corectamente yena hunto cu anexo di mas tarda 21 di mei 2019 na: Print Media Aruba/4Sale Magazine, Seroe Blanco 20.

Tambe por scan e formulario yena firma y email esaki prome cu 21 di mei 2019 na un di e emailadresnan menciona ariba.

Tur studiante cu actualmente tin beca di ASF mester aplica di nobo pa aña 2019-2020 y email esaki preferiblemente na Info@arubascholarships.com of entreg’e na Seroe Blanco #20.

Busca e documentonan rekeri na tempo, manera esun di belasting y corda inclui un copia di paspoort (valido) of di un otro prueba di identidad.

Aruba Scholarship Foundation tin varios criterio, ora ta evalua e candidatonan.

  • Un criterio cu ta pisa hopi ta e necesidad real pa ayudo financiero. Entre otro, ta tene cuenta cu gasto di estudio , e forsa financiero real di famia, disponibilidad di fondo di otro fuente, entre otro, prestamo di estudio di gobierno y otro factor cu por ta gasto extraordinario di e famia.
  • E instituto y estudio logicamente mester ta acredita pa e pais di estudio y pa gobierno di Aruba.

Si e studiante tin algun duda tocante e estudio cu e ke sigui of tocante e instituto cu el a scoge, semper e por acerca Departamento di Enseñansa pa guia profesional of consulta un website relevante riba internet.

  • Tambe ta importante cu e hoben mester ta un bon studiante cu bon prestacion na scol secundario.
  • Banda di esey ta tene cuenta cu otro factor manera ambiente socioeconomico di e studiante cu por a afecta su habilidad pa haya punto halto, participacion den actividad caritativo civico, cultural of deportivo.
  • Tur studiante cu haya beca mester compromete su mes pa bin traha na Aruba pa mes tanto aña cu el a studia cu beca di ASF.

Nos ta pidi tur hoben cu ta interesa den un beca di ASF pa email ASF tocante nan interes, download e formulario di admision riba nos facebook pagina, yena e formulario, busca e documentonan necesario y entrega of scan y manda e documentonan digitalmente pa ASF.