Den 29 aña di existencia cu Aruba Scholarship Foundation (ASF) ta otorga beca, nan ta un instancia cu a draai completamente independiente, asina Sr. Etley Lasten kende ta vice presidente di e fundacion aki a bisa. “Nos kier keda draai independiente tambe y cu placa di comunidad nos ta yuda tur hendenan”, el a bisa.
Sinembargo sr. Lasten a laga sa cu actualmente e fundacion ta den un situacion cu nan mester di mas fondo pa yuda studiantenan. Proximamente nan lo bin cu un campaña pa recauda fondo, y nan ta spera cu comunidad por sigui apoya e fundacion aki pa nan sigui otorga becanan, manera nan ta bin haciendo pa casi tres decada.
Plan di beca
El a laga sa cu tur studiante cu actualmente ta inclui den nan plan di beca tin garantia pa sostene nan durante e proximo añanan. Pero e situacion ta birando dificil pa nan sigui otorga mas beca na esunnan nobo.
El a bisa cu un rekisito basico pa nan otorga beca ta cu e studiante mester a caba un scol na nivel di HAVO, WVO, EPI y/of Internacional Highschool. Pero tambe e cifra y e prestacion di e studiante tambe ta hunga un rol hopi grandi. E cifranan mester ta den un promedio di 7 pa e studiante por haya beca. Na nivel di Merca e cifra mester ta minimo un 3.0, y esaki ta un factor importante.
Ora cu un studiante ta haya un beca fei ASF, e fundacion aki ta keda monitor con e resultado ta di e studiante, pa asina nan keda prolonga su beca.
“Y si nan no ta bay bon durante e studiamento tin chens cu nos ta duna nan un advertencia pa nan drecha esey”, el a bisa. Nan a conoce e tipo di experiencia aki cu studiantenan sa pasa, y cu finalmente e ta drecha su cifranan.
Un otro criterio banda di esunnan anterior ta e echo cu entrada di e mayor ta hunga un rol hopi grandi. ASF kier duna beca na e hobennan cu tin mester di mas recurso, ya cu nan mayor tin poco recurso. Recientemente cuater studiante a haya beca, ya sea cu nan a prolonga nan beca of cu pa prome biaha nan ta wordo honra cu un beca.
No Hulanda
Tur studiante cu ta aplica pa un beca fei ASF pa bay studia afo den cualkier pais di mundo -cu excepcion di Hulanda- tin chens di haye si ta cumpli cu nan criterionan.
Sr. Lasten ta indica cu e studiantenan cu ta bay Hulanda no ta aplica, pasobra Hulanda tin un instituto cu ya caba ta duna beca pa e studiantenan haci uzo di dje. “Nos kier yuda esunnan cu no ta haya beca pa bay studia”, el a bisa,
El a splica cu si e studiante ta bay Merca, ta abo mes tin cu cubri bo gastonan. Logicamente e studiante ta haya un fiansa di Gobierno, pero e resto bo tin cu cubri. P’esey mes nan ta duna mayoria di beca na e studiantenan cu ta bay Merca. Pero tambe na otro paisnan, manera Costa Rica, Canada, Colombia, Belgica, Spaña, Venezuela, etc… “Tur esey ta posibel. Nan ta pensa cu studiantenan cu ta bay Merca so ta haya beca. No, tur caminda nan por haya beca pa bay studia”, el a bisa.
Bon comunicacion…bon resultado
Finalmente, Sr. Lasten di ASF ta considera hopi importante pa ora cu nos hobennan ta studiando pa nan mayornan mantene un bon comunicacion cu nan y nan cu nan mayornan. E pakico di esey ta cu e relacion aki mester keda existi pa tin un bon motivacion, el a bisa
“Hopi biaha e resultado ta determina tambe a base di e comunicacion cu nan mayornan”, segun Sr. Lasten.
P’esey e ta pidi pa keda mantene un comunicacion estrecho cu otro. Aunke awendia tin sistema manera Skype cu ta brinda e posibilidad pa tanto mayor como nan yiunan studiante semper t’ey. El a bisa cu esaki ta un factor cu ta trece un exito grandi cerca e studiante y un satisfaccion grandi cerca nan mayornan.
El a bisa cu e fundacion ta haci tur loke ta posibel pa nos studiantenan sigui nan studio superior, pero cu ta keda na nan hopi biaha pa nan ta exitoso. “Studiamento esey si nos no por haci pa nan, ta nan tin cu haci’e”, asina sr. Lasten a declara.
Nan ta orguyoso cu studiantenan cu a yega haya beca fei ASF awe nan ta profesional cu posicion clave den nos comunidad.
