A base di e informacion cu a ser divulga te awor aki, por conclui cu Aruba por bay asumi responsabilidad pa desmantelacion y limpieza di daño ambiental causa pa e presencia di casi 100 aña di e refineria. Te awor ainda ta existi un acuerdo entre Pais Aruba y Valero cu si yega na tres aña di no uza e refineria, Valero lo ta responsabel pa desmantela y entrega e tereno limpi na Pais Aruba.
Cu e peticion di banda di gobierno di Aruba pa para e proceso di desmantelacion, a yega na un pausa den e asunto aki. Mientras tanto gobierno a anuncia di a yega na un acuerdo provisional cu Citgo pa tuma e actividadnan di refineria y almacenahe den forma di lease, mientras cu e propiedad mes lo pasa di Valero pa un compania estatal cu lo administra esaki. A yega di lansa e pregunta caba, tambe den e corant aki, kico lo ta e condicionnan di Valero pa cede su propiedad cu tin cierto balor. Entre otro un facilidad di almacenahe di crudo bon ekipa, cu un balor creciente awor cu den e parti di Caribe aki no tin suficiente capacidad pa almacena producto petrolero. PDVSA, un di e companianan mayor den region ta continuamente en busca di luga pa warda y mescla crudo, pa por mehora calidad di crudo y obtene un producto cu por mercadea miho. Ademas e refineria mes tambe tin cierto balor. Ta conoci cu na cierto momento Valero tabatin pensa pa keda cu e parti di transshipment, pero si awor nan ta dispuesto pa cede henter e propiedad, algo a cambia na caminda. Por ta cu nan a haya e compromiso serio cu cediendo e propiedad completo, nan por keda sin responsabilidad di desmantela y limpia e tereno.
Mientras cu Valero ta declara cu nan no sa duna comentario riba ‘business negotiations’, loke den e caso aki ta resulta masha conveniente pa nan, di banda di gobierno di Aruba ta dificil pa mantene e mesun punto di bista aki. Por lo tanto ta na gobierno di Aruba pa duna claridad den e asunto aki. Y si gobierno no tin gana di papia, ta na partidonan den Parlamento pa percura pa gobierno papia riba e asunto aki. Y de paso nos por puntra tambe con ta para cu e responsabilidad di e compania estatal cu lo bira doño di e propiedad y por lo tanto ta esun cu lo mester percura pa desmantela, dia cu no tin un refineria mas den operacion.
Por cierto den un entrevista cu Ariën Rasmijn pa Caribisch Netwerk, cu asesor Richard Arends di gobierno di Aruba a declara cu ta negociando awor cu Valero e creacion di un fondo pa limpieza di e propiedad, cu den nan concepto Valero mester bay paga. Esey ta zona masha bunita, pero Valero por argumenta cu si nan ta laga instalacion cu balor economico atras, nan kier bende esaki y si cos no bay bon den negociacion, nan por cumpli cu e contract y desmantela simplemente. No mester lubida cu e partinan cu a keda opera no ta cay bao di e acuerdo cu Pais Aruba, pasobra ta e parti cu no ta opera pa tres aña sigui ta cay bao di esaki. Valero ta propietario legitimo y ningun hende por obliga nan cede nan propiedad cu ta operando si nan no kier. Si Valero ta dispuesto pa cede henter e propiedad, nan ta den posicion pa exigi algo di nan beneficio. Ta dificil pa imagina ademas cu Valero ta bay cede un refineria pa un di nan rivalnan riba mercado Mericano (Citgo), anto bay paga tambe pa limpieza di e tereno. Den nan posicion como competido comercial por ta cumbini mas pa nan desmantela, ya nan no ta laga nada atras pa un adversario comercial bin probecha.
Bon mira, e cambio crucial den e asunto ta cu Citgo no kier tuma e refineria over bao di e condicionnan manera Valero a haci. Valero ainda e cumpra e propiedad completo for di El Paso y asina a asumi e responsabilidad di entrega e propiedad na Pais Aruba den un cierto estado, cu un refineria desmantela y cierto limpieza. Esaki ta haci cu dia Citgo bay como huurdo, nan no ta responsabel pa desmantela. Ey ta parce cu gobierno a bay na rudia pa percura pa Citgo bin, exonerando ambos partido, tanto Valero como Citgo di mester desmantela. Laga gobierno sigui gaba cu henter e chasco aki no ta costa Aruba nada. Talbes awor nos no mester paga nada, pero esey no kier men cu den futuro nos no mester. Y e peligro ey ta mas grandi cu nos ta kere, sigur si Valero keda exonera.
Naturalmente por argumenta cu esey no ta problema pa awor, pasobra supuestamente lo bay tin un acuerdo pa binticinco aña cu Citgo. Pero despues e responsabilidad ta di esun cu tey ainda y esey ta e compania estatal cu tin un refineria obsoleto cu mester desmantela. Cu politico ta argumenta di e manera facil aki no mester causa asombro, pero nos no tin pakico acepta esaki.
