A pesar cu e cantidad di caso activo di Covid-19 na nos isla, como tambe e cantidad di hospitalisacion relaciona cu e malesa, informacion ta indica cu Aruba ta purbando di evita un lockdown manera otro teritorionan den Reino, manera Corsou, Boneiro y Hulanda. E prioridad ta absolutamente pa no cera frontera, y tambe percura pa cualkier medida adicional no stroba e recuperacion di turismo.

Esaki segun un relato di periodista Sharina Henriquez pa portal online Ret Karibense. “E aumento aki no ta cumbini, net na momento cu nos tin un situacion caminda turismo ta bay miho”, minister di Salubridad, Turismo y Deporte, Dangui Oduber, a expresa. “E ultimo calculacion pa maart ta mustra esaki tambe, cu nos lo bay haya 43mil turista. Y pa e di dos kwartaal binidero atrobe lo tin un aumento di stoel den avion, cu ta mas halto cu na 2019.”

Esaki mientras cu e centenares di caso activo na Aruba toch a resulta di aumento di medidanan di pandemia – pasobra esaki ta e prome biaha, desde comienso di pandemia un aña pasa, cu hospital tabata asina yen. Asina tambe siman pasa a ricibi advertencia di hospital cu e cantidad di cama den ICU tabata yegando su limite. No solamente pa falta di respirator of suministro medico, sino pa falta di personal.

Cu e capacidad di hospital den peliger, crisis team a introduci medidanan nobo, manera prohibicion di consumo di alcohol riba caya, of bishita na cas di persona. For di dia 27 di maart ultimo a alarga toque de queda cu dos ora, a cera scol mas trempan pa vakantie di Pasco, y pa segundo aña consecutivo ta prohibi campamento.

Pero a pesar di tur esaki, Crisis Team – contrario na specialmente Corsou y Boneiro – no ta parce di kier perhudica turismo cu e medidanan di restriccion nobo. Pa e motibo aki sector horeca si ta keda habri, djis cu un orario limita. E reglanan pa come afo tambe a bira mas realaha – dos persona cu mag sinta na mesa a bira cuatro, y sin conta mucha bao 12 aña. Ademas esnan cu ta sinta hunto no mester ta den mesun ‘bubble’ – esta, no mester ta di e mesun cas of ta amigo di otro.

Sharline Koolman di DVG a splica pakico a relaha e medida aki particularmente, mientras na mes momento ta informa cu restaurantnan ta den top 3 di foco di contagio na nos isla. “Bon mira ta bar cu tin permiso di restaurant y tambe caminda semper tin hopi hende ta drenta. Kiermen e problema no ta caminda bo ta sinta nechi cu cuatro hende come na mesa y bay atrobe. P’esey nos a suavisa esey atrobe”, el a declara.

Den e top 3 di foco di contagio, ademas tin misa y gym. E ultimonan aki mester a keda cera durante dos siman desde introduccion di e medidanan nobo. Mita di casonan nobo ta bin di e variante Britanico, cu ta hopi mas contagioso. Tambe tin hende ta cana rond cu sintoma sin reporta esakinan, of no kier bisa cu ta contagia, segun Koolman. Di un tercer parti, gobierno no por a yega na e fuente di contagio.

Mientras cu Corsou a alcansa Aruba cu e cantidad record di contagio activo (mas cu 2mil), Aruba ainda tin e record di cantidad di morto pa e virus, cu 90 fayecido. Na Corsou, te awo, 48 persona a fayece, 27 na St. Maarten y 12 na Bonaire. Y toch Aruba ta leu di e medidanan mas estricto cu e otro teritorionan den Reino si a implementa.