Den un comunicado Prome Minister Evelyn Wever-Croes ta declara cu e suma di 12 miyon florin lo yega pronto pa asina gobierno di Aruba por fortalece medidanan di siguridad riba costa y tambe amplia facilidadnan di detencion di personanan sin status regular di admision.
Hulanda na mei ultimo a indica cu nan ta dispuesto pa yuda Aruba y Corsou pa atende cu e crisis di Venezuela cu 23.8 miyon euro cu ta alrededor di 55 miyon florin. Un parti di e 55 miyon florin Hulanda lo uza pa e mes yuda nos. Pero pa e otro parti, Aruba y Corsou mester a entrega nan lista structural di plannan y proyectonan y entrega esaki na Hulanda. Aruba aworaki ta yegando na e punto culminante na unda cu Hulanda lo duna e fondonan pa realisa e plannan y proyectonan di gobierno di Aruba den e situacion aki.
Prome Minister Wever-Croes a indica cu Aruba lo ricibi alrededor di 12 miyon florin pa yuda den e crisis di Venezuela. E 12 miyon florin aki ta bay pa fortifica Aruba como pais den haci Aruba mas sigur pa asina atende cu e crisis miho posibel. “E ta pa yuda gobierno controla nos fronteranan miho p’asina nos percura pa domina e crisis cu nos tin internamente.” Control riba lama y tera lo bira mas estricto pa asina evita importacion ilegal di substancianan, arma como tambe di persona. E tema di trafico humano ta un problema serio cu ta tumando luga demasiado hopi den nos region, e prome mandatario a indica.
Tambe e placa aki lo amplia e capacidad di detencion na unda persona ilegal por keda mientras nan ta warda e fecha prome cu nan manda nan bek nan pais. Esaki den e tempo aki ta hopi importante y necesario mirando cu e fluho di ilegalidad na Aruba a aumenta. Ampliacion di e capacidad di detencion lo trece mas trankilidad. Parti di e fondo aki lo wordo uza tambe pa enseñansa. E crisis den enseñansa, mescos e crisis di Venezuela riba tereno social, tambe por haya mas atencion.
No ta placa pa yuda migrante, si no pa fortifica Aruba
Ta bon pa remarca si, cu e placa aki lo no ta disponibel pa crea vivienda y otro cosnan asina pa e personanan cu ta bin haci peticion di asilo. E placa aki ta bay pa fortifica Aruba como pais den haci Aruba mas sigur pa asina atende cu e crisis miho posibel.
“Mi ta hopi contento y satisfecho cu nos ta yegando na e punto unda cu Aruba por haya e fondo aki. Tin hopi persona den departamentonan di gobierno cu a traha hopi duro pa awe nos a yega asina leu. A pesar cu esaki no ta tur loke nos tin mester pa atende cu e crisis, nos ta gradici Hulanda pa e fondo aki. E ta un bunita gesto di parti di Hulanda. E 12 miyon florin aki ta hopi necesario. Combina cu e helicopter, cu e radar cu pronto lo bin, Gabinete Wever-Croes lo percura pa haci Aruba mas sigur den tur circunstancia, cu of sin crisis di Venezuela. Nos compromiso ta un Aruba mas sigur pa cada ciudadano.”
