ORANJESTAD – Recientemente a tuma luga e torneo interinsular ABC, unda Aruba, Corsou y Bonaire a topa otro tras di borchi di dam.

Cada pais a presenta cu 2 team di 2 persona. Bonaire y Corsou a manda un hungado hubenil mientras Aruba cu ta e pais organisado por a participa cu 2 hungado hubenil.

E prome team di Aruba ta wordo representa door di Mario Jansen y Annelaine Jacobs. Segundo team di Aruba door di Octavio Croes y Delbert Alexander.

Hungado hubenil di Aruba ta e rumannan Alan y Angel Suarez.

E weganan a tuma luga den e members lounge di Playa Linda Resort.

Diabierna 2 rond a wordo hunga y diasabra 2 rond.

Diadomingo tawata tin entregamento di premio na e ganadonan.

Na prome luga a termina Corsou cu un total di 15 punto den e 2 teamnan conta hunto.

Un team di Bonaire so (Bon1) a tabla un team di Corsou (Kor2). Corsou a gana tur e otro encuentronan.

Na di 2 luga, a termina Bonaire. Aruba-2 a tabla 2 wega cu Bonaire.

Den seccion hubenil, Aruba a bay cu e prome luga. Alan a tabla un wega so, contra su ruman y a gana di Corsou di Bonaire.

Na di 2 luga tawata tin un empate entre Angel Suarez di Aruba y Virginio Cicilia di Bonaire. Angel tawata tin 3 wega empata y Virginio 1 gana, 1 tabla y 1 perdi.

Pa kibra empate, nos a check kende tin mas wega gana. Virginio Cicilia di Bonaire a keda e ora na di 2 luga y Angel di Aruba na tercer luga.

Den e seccion di adulto di e teamnan, nos a saca e brommer 3 luganan individual.

Na prome luga a sali Mijail Eisden. Mijail a gana tur su weganan y a score 8 punto for di 4 partido.

Na segundo luga, tawata tin un empate entre Carlos Lorevil di Korsou, Norwin Lau di Bonaire, Richinel Anthony di Bonaire y Silvio Blijden di Korsou. Nan tur 4 a score 5 punto for di 4 partido. Carlos y Norwin a hunga den e prome team y ta e prome hungado den e team. Pues nan a haya contrincante mas fuerte. E team di Corsou a gana mas punto cu e team di Bonaire y asina Carlos a bay cu e segundo luga y Norwin Lau cu e tercer luga.

Best scorer pa Aruba tawata Octavio Croes. El a gana 1 wega y tabla 1.

Durante entregamento di premio, Corsou y Bonaire a elogia Aruba pa e bon organisacion di e torneo ABC. Otro aña Bonaire ta na beurt pa organisa esaki.

Tambe a wordo menciona cu Aruba ta e pais cu a propone e encuentro ABC aki, na 2004 y ta e prome pais cu a organisa e torneo ABC aki. Esaki a bira un exito, cu despues di 15 aña, ainda esaki ta tumando luga.