Ayera atardi, na Futura Cafe a firma un Letter of Intent (LOI) entre Gobierno di Aruba, Camara di Comercio y Industria (KvK) y Universidad di Aruba, den caminda pa converti e isla den un teritorio di incubacion, den marco di celebracion di e siman di Immerse, Aruba su siman di innovacion.
Varelie Croes di Futura a comenta cu esaki ta e prome biaha cu nan ta firma un Letter of Intent pa nan desaroya un plataforma di incubacion pa entrepreneur na Aruba.
El a bisa cu nan ta trahando hunto cu colaboracion di partner pa basta tempo caba, algo cu tin mester y di necesidad, un proyecto cu ta hopi bunita pa comercio y entrepreneur pa yuda nan pa ta mas exitoso, pa yuda companianan nobo pa lanta y duna nan e apoyo cu nan mester.
A denomina e proyecto ABIA (Aruba Business Incubation Agency), unda lo asigna un directiva pa maneha e plataforma aki. Un di e aspectonan mas importante tras di esaki ta e colaboracion cu ta wordo crea door di conecta tur stakeholder cu ta haci posibel cu tur participante ta contribui cu un solo meta y comparti actividad y conocemento tecnologico.
E ecosistema ta brinda oportunidad pa comparti y baha cierto gastonan y ta stimula colaboracion via innovacion cerca companianan.
Prome Minister Evelyn Wever-Croes a expresa su felicitacion pa tur esunnan cu ta colabora cu e proyecto aki, esta Universidad di Aruba, Camara di Comercio y Industria y Futura, pa motibo cu vision di Gobierno ta pa nan sostene locual ta importante, manera companianan mediano y chikito pa yuda nan bira fuerte, para riba nan mesun pia y despues sigui exitosamente pa yuda desaroya economia di Aruba.
Kawish Misier, Presidente di Camara di Comercio y Industria (KvK), a trece dilanti cu esaki ta un proyecto cu nan ta bezig desde mas cu un aña. Su desaroyo tin un plan di negoshi cu ayera a yega na un LOI, pa dedica pa traha hunto den un forma di modelo unda e sector priva, hunto cu Gobierno y Universidad di Aruba, lo hiba Aruba dilanti y trece un plataforma pa facilita pa e negoshinan, entrepreneur y hobennan profesional bay dilanti.
Tambe el a señala cu e plataforma aki ta estableci pa facilita diferente incubador. Den esey el a papia di incubador di tecnologia y agricultura por ehempel, cu tin hopi demanda pa nan crea solucionnan pa problemanan grandi cu tin awor na Aruba y tambe den otro parti di mundo. A traves di ABIA lo facilita pa eleva e nivel di negoshinan chikito. “Nos kier enfoca riba problemanan mas grandi, pasobra esey ta trece oportunidadnan di negoshi mas grandi’, Misier a manifesta.
Di mesun manera, Misier a bisa cu si na sa kico ta e problemanan, nan entrepreneur por bin cu solucionnan y e miho solucion ta bay wordo implementa na Aruba, si ta un bon solucion innovativo e por crece den otro partinan di mundo y den e investigacionnan cu nan a haci, Misier a informa cu e acuerdo entre gobierno, sector priva y universidad cu un plataforma di Business Incubator cu Aruba ta e prome isla den mundo cu ta bin cu un plataforma nacional cu tur stakeholders pa bin cu un Business Incubator.
Di su parti, Glenn Thodé rector di Universidad di Aruba, a conta cu nan como Universidad ta hopi orguyoso cu e LOI aki, Business Incubation ta sumamente importante pa Aruba, cu ta un isla cu tin hopi creatividad y esey ta confronta cu condicionnan dificil pa trece solucionnan practico tras di e ideanan creativo cu tin.
Cu e colaboracion di e plataforma aki, nan ta bay mehora e condicionnan y p’esey nan ta yama ‘Incubator’ – e condicion bon pa un baby por desaroya aden. Nan a crea e condicionnan optimal pa un persona creativo por lanta su propio negoshi. Como universidad ta posibel pa nan duna conseho, cu un red cu a yuda den otro paisnan pa crea condicionnan similar pa creatividad por wordo cambia y poni den condicion pa e negoshinan di hendenan hoben. Nan lo continua cu esey. “Mi ta sigur cu e idea di tripel Helix ta bay yuda e comunidad di Aruba pa tin exito den esaki”, Thodé a sigura.
