Ultimo weekend di carnaval a yega, pa hopi e ta un sentimento dushi y amargo na mesun memento. Despues di dos aña Aruba, e pueblo carnavalesco a logra celebra Aruba su dushi carnaval un biaha mas, pero pa hopi e temporada no tabata suficientemente largo y a pasa hopi, lagando asina e sentimento dushi y amargo.

Carnaval ta parti di Aruba su cultura, e ta representa Aruba su identidad y ta un di e celebracionnan mas grandi den Caribe. Awe ta tuma luga e parada grandi di San Nicolas y mañan e parada grandi di Oranjestad, e ultimo dos paradanan pa e carnaval 69 y na final di ultimo parada, na Oranjestad, lo tin e traditional kimamento di momo.

Hopi ta prepara cu anticipacion y for di aña pasa caba nan ta bezig cu tur nan preparacionnan pa asina por luci ariba e cayanan di Aruba mientras nan ta disfruta di e dushi ambiente di carnaval cu Aruba so por ofrece.

Pero un anochi prome cu e gran weekend ainda tin hopi persona ta organisando y preparando e ultimo detayenan prome cu disfruta di e paradanan. Desde e cosedo, pa e decorador, pa e makiyado, pa e welderdo, e trabou no ta stop te ora cu e temporada termina.

Costurera, Norleidys Lake, ayera nochi ainda tabata terminando e ultimo detayenan di algun paña cu lo wordo luci den e paradanan. “E ta hopi trabou. Aunke bo cuminsa trempan, dias, simannan of hasta lunas prome, semper tin algo cu mester wordo haci te na ultimo momento, te na e mesun dia prome cu parada hasta,” el a bisa.

Lake ta un costurera cu ta torah como costurera henter aña. E ta cose pa grupo di baile, pa clientenan personal y e tin experiencia, pero e ta indica cu aunke e tin su experiencia, y trabou ta bin cu su retonan.

“E ta hopi stress tambe. Y semper por pasa cu net na momento cu bo tin mas stress of bo tin mas pura pa caba cu e cosnan, algo ta pasa, e hilo ta kibra, e hangua ta kibra, bo no por haya e sker, bo no por haya cualkier cos cu bo tin mester di dje e momento ey. Pero mester siña traha trankil y no drenta den panico. Na final tur cos lo keda cla, laat of trempan,” el a conta.

No por nenga cu carnavalistanan a disfruta di carnaval despues di dos aña di su ausencia. Carnavalista Jessy Alvarado, a conta cu e tabata hopi entusiasma pa carnaval e aña aki. “Mi ta un hende cu gusta ambiente, mi gusta canta, mi gusta baila, mi stima carnaval y mi ta hopi contento cu nos a disfruta di carnaval e aña aki.”

El a sigui conta cu pa paradanan grandi e ta bayendo cu e grupo cu ta habri parada, Royal Carnaval Group, y aunke e ta cla pa subi caya y baila de principio te fin, ainda e tin algun detaye cu mester caba drecha.

“Mi paña no ta full cla ainda, ainda tin cos pa decora, pa drecha. Ami gusta decora paña, kiermen mas steenchi, mas briyo mi pone, miho pa mi. Esaki ta e temporada pa luci y gosa y mi ta hopi entusiasma pa baila te cu mi pianan no por mas,” el a indica.

Pueblo di Aruba ta cla pa disfruta di e ultimo paradanan di carnaval 69, sea ta na banda of den dje, ambiente di carnaval lo falta ariba e cayanan di Aruba. Keda pendiente di nos siguiente edicion di Bon Dia Aruba pa mira relato di e paradanan grandi di San Nicolas y Oranjestad.