Na debatenan general di Nacionan Uni
Dia 17 di juli cu a pasa, minister Otmar Oduber (POR) den e funcion como lider di delegacion di Reino pa locual ta e ‘High Level Political Forum’ di Nacionnan Uni a ricibi espacio pa duna un declaracion nacional di parti di Reino durante di e debatenan general di Nacionnan Uni.
Segun e comunicado ricibi di gobierno, algo cu a resalta pa diferente motibo ta cu conhuntamente cu e miembro di hobennan di Nacionnan Uni, minister Oduber por a presenta e diversidad pa locual ta e Reino Hulandes y asina logra contribui na posiciona Aruba como un pais cu ta ‘hopi diverso y visionario’, pa locual ta e diferente temanan di Nacionnan Uni y di metanan sostenibel cu a wordo formula den aña 2015.
Por bisa cu den un sala cu diferente pais grandi y chikito Aruba a resalta di tal forma unda cu no solamente por a mustra e diversidad di Reino por medio di e diferente paisnan, pero tambe a trece dilanti e importancia di e hobennan cu lo carga e mensahe cual ta desaroyo sostenibel.
Tambe tabata hopi aparente e sosten cu minister Oduber a duna den forma di trece dilanti e hoben cu ta representante di Nacionnan Uni cu yama Emma Clemmens, pa asina duna un declaracion di e importancia di semper envolvi tur actor, especialmente hobennan pa locual ta metanan den futuro. E sesion a bay hopi bon y a ricibi hopi elogio pa locual ta pais Aruba su esfuersonan.
Banda di esaki a duna informacion pa loke ta plannan pa futuro y tambe a comparti retonan cu sigur tur pais ta comparti y asina conhuntamente siñando di otro, treciendo bek e aspecto di ‘Lessons to be Learned’.
Di e forma aki conhuntamente, Aruba por a contribui na locual ta metanan internacional, pero tambe riba nivel local di sostenibilidad, e comunicado ta finalisa.
