Den un presentacion duna pa studiantenan di Universidad di Aruba su programanan academico diverso, Gerlien Croes, kende ta Policy Official na oficina di relacionnan Europeo y di Reino a splica cu e universidad ta e partner mas grandi den region pa Erasmus+. Oficina di asuntonan internacional tambe a amplia riba e posibilidadnan pa studiante na nivel di Bachelor, Master y PhD.
Ora ta trata di estudio den exterior, un reto grandi pa studiante y nan mayor ta pa averigua con ta bay paga pa nan estudio. Tin un cantidad di studiante cu no ta scoge pa bay studia den exterior cu un prestamo pa asina preveni cu nan ta keda cu un debe grandi riba nan lomba pa un temporada largo di nan carera profesional. Den e caso aki tin studiante cu ta dicidi di sea studia den region of na Aruba mes. Pero hasta si un studiante dicidi di studia na Aruba mes, esaki no mester kita un studiante su chens pa bay afo.
Erasmus+ a redobla presupuesto pa entre otro mobilidad di studiante y docente
Pa e rason aki e programa di Erasmus+, cual ta financia un gran parti di costonan pa studiantenan cu nacionalidad Hulandes (Europeo) na Aruba, t’ey. Fondonan procediente di Comision Europeo ta poni riba disponibilidad di institucionnan academico pa asina sigura cu studiantenan, pero tambe docentenan por haya mobilidad. Te cu 2017 tabatin mas o menos un 14.7 biyon disponibel pa un temporada di mas o menos 5 aña. Te 2023 Erasmus+ a redobla e presupuesto disponibel pa e programa na 30 biyon te cu 2023. Banda di apoya docente y studiante nan mobilidad, e programa tin como accionnan clave financia cooperacion riba nivel di innovacion y reforma di maneho. Ademas di esaki ta enfoca riba actividadnan deportivo.
Universidad expandiendo opcionnan pa intercambio den exterior
Pa studiantenan di Universidad di Aruba esaki kiermen cu nan no mester sacrifica oportunidadnan na otro pais mientras nan ta studiando na Aruba: Riba nivel di Bachelor, prome cu gradua, studiantenan por scoge pa haci un stage of haci un intercambio na un universidad den exterior. Igualmente na nivel di Master y eventualmente PhD. Pa cada programa (Ley, Organization, Governance & Management, Social Work & Development, Hospitality and Tourism Management Studies y FEF) tin cierto institucionnan cu
Universidad di Aruba a cera convenio cu nan pa studiante por haci intercambio.
Algo importante di nota ta cu studiantenan ta haya un suma pa paga ticket pa e pais na cual ta bay. E suma ta depende di con leu e pais ta di Aruba. Ademas ta haya un suma di mas o menos 700 Euro, dependiendo riba con caro e pais unda ta bay ta, pa cubri gastonan manera huur, cuminda y transporte. Pero e studiante mes lo tin cu regla unda nan ta keda, etc. Universidad tin actualmente partnernan principalmente na Merca y Europa, y ta sigui cera convenio cu universidadnan den exterior. Recien a agrega paisnan manera Romania. E mesun convenionan aki ta haci cu studiantenan di exterior cu ta bayendo e institutonan cual tin acuerdo cu Universidad di Aruba por tambe bin haci intercambio na Aruba.
E gastonan relaciona cu estadia entre e continentenan ta diferencia tambe. Un di e docentenan cu tabata presenta na e presentacion di oficina internacional a comenta cu maske pa Europa e placa ta yega, na Merca e por ta un poco dificil pa biba djis di e suma cu Erasmus+ ta duna. Esaki por bisa sigur di studiantenan cu ta haci un stage na oficina di Minister Plenipotenciario na Washington, segun e docente di fam Maduro.
Stage na Washington pa studiantenan di Ley y OGM
Den cuadro di cierto estudionan, esta ley y OGM, tin espacionan habri den cada temporada na oficina di Minister Pleniptenciario, kende actualmente ta Joselin Croes. E stage aki ta duna prioridad na studiantenan Arubano. Tanto studiantenan Arubano cual a studia na UA como studiantenan cu a studia na Hulanda a yega haci uzo di e oportunidad aki. Algo pa tene cuenta cu ne ora di plania pa haci uzo di e oportunidadnan cu nan ta brinda, ta pa plania bon cua scol pa bay y spaar pa ora e momento yega, segun oficina internacional di UA.
Den futuro e oficina lo bay ofrece mas variedad pa studiantenan, mediante cu cera mas convenio cu mas universidad den exterior. Studiantenan ta curasha pa sugeri universidadnan specifico cu nan lo kier atende den futuro.
Oportunidad pa haci trabou boluntario
Banda di e aspecto aki pa studiante tambe tabata presente durante e anochi CEDE Aruba, cual pa algun tempo ya tin un programa pa boluntario cu lo kier ofrece nan servicionan den cuadro di e European Solidarity Corps. Durante e anochi Yolanda Richardson Smith di CEDE Aruba a splica cu banda di e oportunidadnan aki cu Universidad ta ofrece, studiantenan y pueblo di Aruba en general por bay haci trabou boluntario na Europa, cual tambe ta financia por medio di fondonan Europeo. Richardson Smith a splica cu CEDE ta ehecutando tres proyecto actualmente.
E prome a cuminsa cune 2 aña pasa, trahando como boluntario yudando personanan cu debilidad mental na Catalonia. Banda di esaki, un grupo tambe a bay aña pasa Inglatera pa conscientisa personanan bayendo festivalnan den parkenan grandi pa genera menos desperdicio. Den October venidero lo cuminsa un proyecto na Suecia pa 9 luna yudando migrantenan y refugiadonan aya. Esaki, mescos cu e programa di Erasmus+, ta financia. Richardson Smith a indica cu hasta ta regla estadia pa nan boluntarionan.
