Diadomingo ultimo Aruba Padvindsters Gilde (APG) a uni na Orange Aruba 2016, e campaña di concientisacion riba e problematica di violencia contra Hende Muhe y mucha Muhe den nos comunidad, cual ta un projecto di Fundacion pa Hende Muhe den Dificultad (FHMD). APG a mustra nan sosten pa cu e problematica aki cu un bunita marcha di nan padvindsters door di e cayanan di San Nicolaas, sigui pa un tremendo presentacion den Club Santa Teresita.
Club Sta. Teresita tabata dorna cu poster traha door di e muchanan cu ta indica cu nan kier pa e violencia STOP AWOR. APG ta hasi un trabao fantastico educando nos mucha muhenan di 4 aña te cu teenagers y hende muhe, pa nan tin self esteem, disciplina y tur e hermentnan cu nan mester pa crece bira teenagers y hende muhe cu ta exigi respet pa nan mes y cu lo ta lidernan di futuro. Nan ta hasi esaki na un manera cu ta cuadra cu cada edad y cu cada situacion cu mucha muhenan ta enfrenta na e diferente edadnan aki.
Despues di un introducion door di e presidente di FHMD, Sra. Suzy Kock, a sigui cu un presentacion door di presidente di directiva di APG Board, Sra Lourdez Emerenciana, cual a carga e nomber “Cada Mucha Muhe: Un den 10 Miyon”. Aki por a sera concoci cu e diferente gruponan den APG: for di esunan mas chiquito (Bellisimas), pa e Kabouters, sigui pa e Padvindsters, miembronan di e drumband, assistent leidsters y leidsters. Tur grupo ta consisti di muchanan disciplina, jen di energia y entusiasmo. Nan a canta, baila y laga e publico scucha nan ‘yells’, manera esun: “Si un cos ta bon, ta bon e ta!”
Despues di esaki Sra. Zuzette Croes a duna un presentacion riba e programa di APG jama “Free Being Me”, cual a ensera tambe un video tocante “Free Being Me in Aruba” y un baile “What a girl is”. Den e video e muchanan ta papia tocante kiko kiermen pa nan hasi algo “..like a girl..”. Esaki hopi biaha ta wordo duna un signifacion negativo, kiermen cu loke un mucha muhe ta hasi no ta bon of no ta mesun bon cu un mucha homber. E muchanan di APG kier a mustra cu ‘being a girl’ ta algo great, algo positivo y cu mucha muhe por tur cos y por logra tur cos tambe cu nan pone nan mente riba dje.
Tambe Sra. Croes huntu cu Sra. Oehoe Mirtha a duna splicacion tocante e programa di APG ““Stop the violence”, sigui pa un baile cu un significacion tremendo “Fight Song”. Esaki a resona cu FHMD ja cu e cantica aki tambe ta forma parti di e ‘Orange Aruba’ 2016.
Por a scucha di e padvinsters mes kiko nan a sinja voor di padvinderij y un poema sumamente bunita a ser comparti cu e publico presente. Na final un platte knoop a ser demostra y publico por a join den esaki. Tur hende a ricibi un cabuya cu a ser tiña oranje y por a practica e knopi importante aki. Importante pa motibo cu apesar cu e ta facil e ta uno sumamente fuerte y den e caso di ayera ele a simbolisa tambe e samenwerking cu lo cuminsa entre APG y FHMD.
FHMD ta sumamente impresiona y conmovi cu e trabao di APG y cu nan sosten pa cu e consienticasion di nos muchanan y hobennan riba e tema di violencia contra hende muhe y mucha muhe. Na final presidente di FHMD a aplaudi e trabow inmenso y único cu APG ta bin ta eherciendo cu nos mucha muhernan. No tin otro organisation cu ta traha specificamente cu nos mucha muhernan.
Ta solamente door di educa, informa y forma nos mucha muhenan desde chiquito pa tin un valor propio, respet pa nan mes y respet pa otro, cu nos por logra den futuro un sociedad sin violencia contra hende muhe y mucha muhe. Aruba Padvindesters Gilde merece e sosten y admiracion di henter pueblo di Aruba pa nan trabao valioso cu nan ta hasi completamente voluntario y cu hopi amor.
Fundacion pa Hende Muhe den Dificultad kier a invita henter publeo di Aruba pa su actividadnan di e siman aki, cual lo ta:
- Dia 6 Charla Stichting Rancho (Rancho, 7 pm-9 pm)
“Violencia Domestico contra Hende Muhe y Mucha Muhe”
- Dia 8 Sketch Teatral y dialogo (MFA Noord, 7 pm-9 pm)
“Hende Homber y e rol cu e ta hunga den e problema y e solucion”
- Dia 9 Training Task Force Mensenhandel (Cas di Cultura, 1:30 pm-4:30 pm)
“Awarness training Human Trafficking”
- Dia 10 Clausura Orange Aruba 2016 (Fort Zoutman, 7 pm- 9 pm)
