Siman pasa e board di e grupo di Offroad a logra sinta cu Minister di Husticia, Minister di Infrastructura y minister di Transporte. Esaki ta despues cu Aruba Offroad Foundation a manda un carta di aña pasa na luna di juni cu fundacion a manda carta na diferente Ministernan concerni pa sinta hunto na mesa y traha riba solucion den varios punto di interes.

Sin embargo na e oportunidad aki e reunion a bay den un ambiente di preocupacion debi na varios accionnan cu a tuma luga manera e medidanan cu Parke Arikok a tuma por ehempel para e entrada di ATV y UTV y e incertidumbre riba e plan di maneho pa e 16 areanan cu a wordo menciona siman pasa pa medio di Ministerio di infrastructura, riba esey den comienso bayendo bek ariba e rueda di prensa di Minister Marisol Lopez Tromp unda cu el a anuncia cu dentro di poco no lo permiti e vehiculonan ATV y UTV pa subi caminda publico mas, tur esaki di acuerdo cu e maneho di ROP/ ROPV.

Aruba Offroad Foundation a wordo estableci oficialmente dia 20 di May 2020, representando mas cu 20 compania dedica na tours y rental di all terrain vehicles. Sin embargo e fundacion tabata activo for di aña pasa mirando e necesidad di regula e actividad recreativo ya cu den e delaster temporada a bira masha popular y a trece conflicto entre diferente parti di nos comunidad.

 

E reunion cu ministernan a bay den un ambiente unda cu toch a keda cu basta preocupacion y e Offroad fundacion a keda sin haya informacion concreto riba e futuro plan di maneho. Ainda ta den espera di por traha riba un solucion hunto pa por haya un balans satisfactorio entre naturaleza y e pan di cada dia de tantisimo famianan cu ta traha den e sector economico aki, ta trata di 200 empleado directo y como 600 miembro di famia cu lo bay keda sin cuminda na mesa. Si acaso Gobierno continua cu tur e medidanan encontra di e sector economico aki lo tin e consecuencia cu mayoria di e negoshinan aki lo bay bancarota y esaki lo bay causa un destabilisacion economico den nos Pais.

E meta di Aruba Offroad Foundation ta pa hunto cu Gobierno yega na e miho solucion y regulacion cu nos ta boga pe y teniendo cuenta cu naturalesa.