Ayera atardi varios compania di UTV y ATV a tene un conferencia di prensa pa duna di conoce nan posicion tocante e maneho nobo cu Parke Nacional Arikok a implementa algun dia atras, pa loke ta trata prohibicion di entrada di e vehiculonan aki den e parke. Nan a señala cu esaki no ta e miho solucion.

Aruba Off Road Fundation ta un fundacion lansa cu e interes di por lo menos 20 compania di tour guide, cu aproximadamente 200 trahado. Nan meta ta di interes economico pa asina tur di nan por tin trabou y tambe pone atencion pa naturalesa.

Asina a duna di conoce George Vieira, presidente di e fundacion. Ademas el a splica cu dos siman pasa, despues di un reunion cu gobierno, nan ta dispuesto pa bin cu un solucion of un regulacion pa asina nan tur por biba cune. “Teniendo cuenta cu naturalesa y e pan di cada dia esey ta nos meta, pa traha hunto cu e diferente organisacionnan y principalmente cu Parke Nacional Arikok.”

Viera a expresa cu Parke Nacional Arikok a bin cu medidanan drastico pa entrante dialuna awor 1 di juni, di no permiti cu ATV drenta. Y na luna di october no lo permiti e UTV pa drenta. Asina mes el a destaca cu e motibo cu e parke a expresa no tin bon base, pa motibo cu mientras no lo permiti entrada pa algun vehiculo, otronan mas grandi y mas pisa si mag di drenta y esey no ta un forma di ley pa tur.

Jean Carlo Espinal, PR di e fundacion a trece dilanti: “Despues cu nos a pasa casi tres luna cera na cas pa via di e crisis, esaki no ta e miho momento pa minister Marisol cuminsa un bataya contra companianan di UTV y ATV. Sino cu ta e momento pa dialoga y yega na un acuerdo hunto.”

Asina mes, Espinal a bisa cu trece dilanti e parti di cuido di naturalesa, pero den ultimo reunion cu nan a tene cu Lopez-Tromp, tambe cu minister Andin Bikker y Chris Romero – cu a menciona 16 area protegi –e fundacion a pidi un splicacion mas specifico di kico ta e plan pa cu e areanan aki.

“Nos punto principal ta pa yega na un acuerdo mutuo, ta papia di cuida naturalesa y logicamente nos kier cu tur turista cu ta bin pa practica esaki lo mester haci’e sanamente”, Espinal a manifesta.

E parti cu nan ta haya cu mas preocupacion, segun Espinal a laga sa, ta cu Parke Nacional Arikok a anuncia su maneho nobo. El a declara cu tabata mas facil pa e parke sinta cu e companianan di ATV y UTV, pa motibo cu nan ta puntra kico lo pasa cu e inversion di companianan chikito y cu di un dia pa otro pa via di un medida no por drenta den parke mas.

Segun Espinal, nan ta bayendo Parke Nacional Arikok pa motibo cu pa hopi tempo ATA ta keda promove Aruba cu su Natural Pool, Cuebanan y e mesun Parke nacional Arikok. Y si nan ta promove e producto ey, e turistanan lo solicita pa nan bay pa e direccion ey. “E demanda dia pa dia ta mas grandi pa UTV pa turistanan por yega na Natural Pool.”

E motibo pa cual Parke Nacional Arikok a implementa un maneho nobo, di prohibi entrada pa ATV y UTV, ta pa via di daño pa naturalesa. Pa esaki Espinal a enfatisa cu ‘nos ta core den desierto, e tereno ey ta dificil pa planta’.

“Nos no ta den contra di cuido di naturalesa, pero ban haci’e hunto y pensando logico. Aworaki ATV cu UTV ta e demanda mas grandi cu nos tin den mercado, danki na ATA cu a promove esey”, Espinal a manifesta.

Di mesun manera, el a informa cu su compania pa via di e crisis di pandemia a manda 25.000 dollar bek na refund. Tambe el a trece dilanti cu e abogado di e fundacion a entrega un carta pa Parke Nacional Arikok, den cual a afirma nan posicion cu si nan mester bay corte, nan lo haci’e, pa motibo cu ta papiando di miles di florin cu a wordo inverti den e negoshinan aki.

Tocante e tema aki, Bon Dia Aruba a puntra minister concerni di e area, Marisol Lopez-Tromp riba con leu e proceso di retira UTV for di caminda publico ta bayendo. Pero e pregunta aki no a haya un contesta specifico. Loke Lopez-Tromp a contesta ta cu el a trece dilanti algun tempo pasa e preocupacion cu tin den comunidad y di su persona pa cu e comportacion di e coremento di UTV y ATV riba caminda publico. Tambe el a menciona cu pa loke ta trata e 16 area proteha, tur vehiculo mester tene na cuenta cu e areanan aki.