Ayera a keda publica e rapport Global Trends 2023 di UNHCR, e agencia di Nacionnan Uni pa refugiado. Riba esaki, Aruba a haya un posicion prominente: per capita, Aruba tin e mayor cantidad di refugiado na mundo.

Manera un articulo di NOS ta destaca, Corsou tambe ta para den e top 5, den posicion number 4. Na e isla bisiña, 1 di cada 13 persona ta un refugiado.

Segun e rapport, e cantidad di persona mundialmente cu ta huy for di nan pais a alcansa nivelnan record. Tin alrededor di 117 miyon persona den e situacion aki, segun UNHCR. Aña pasa esaki tabata 110 miyon.
Pa motibo di conflictonan recien, manera na Sudan, Gaza y Myanmar, hendenan a haya nan mes ta huy for di nan pais y tin necesidad urgente pa un solucion. E grupo di refugiado na nivel mundial ta mesun grandi cu henter e poblacion di Hapon.

Refugiado economico

Cu Aruba ta liderando e lista di Nacionnan Uni ta bin pa motibo principal di e Venezolanonan cu ta registra riba nos isla. Nan a huy for di e disturbio interior na Venezuela door di regimen di Nicolas Maduro, principalmente pa Colombia y Brazil, pero tambe na e islanan di Caribe di Reino Hulandes.

E Venezolanonan ta refugiado politico y hende cu ta huy di violencia, pero tambe hendenan cu na nan propio pais no por sigui biba, NOS ta reporta. Asina nan tin un malesa, por ehemplo diabetes, pero na Venezuela nan no por haya remedi pa esaki.

E ora un biahe for di nort di Venezuela pa Aruba of Corsou ta bira un opcion obvio, pasobra e distancia ta cortico. Pero Corsou no tin un procedura di asilo y tampoco ta reconoce e acuerdo internacional di refugiado.
Aruba si tin e legislacion y e obligacion di tratado aki, pero ta considera e Venezolanonan mas como refugiado economico, y pa e motibo aki, masha poco nan ta bin na remarca pa proteccion.

Trabao ilegal
 E consecuencia ta cu casi tur Venezolano na Aruba, y tambe e 17mil Venezolano na Corsou, no tin documentonan di estadia legal y ta scondi. Nan no ta ricibi cuido medico, educacion ni trabao den economia formal.

Gobierno no ta ehecuta un maneho activo di deportacion, pero esun cu ta wordo haya accidentalmente, ta keda deporta inmediatamente, NOS ta comenta.

Oficialmente, traha y contribui cu impuesto no ta permiti, pero esaki no ta nifica cu e indocumentadonan no ta traha. Segun NOS, cualkier persona cu yega centro di ciudad di Corsou prome cu salida di solo lo mira hopi actividad di hende buscando trabao. Nan no ta papia Papiamento, sino Spaño. Busnan ta pasa, stop, y carga hende cu ta bayendo pa traha di manera ilegal.

Den cantidad di sector di economia, por ehemplo construccion, ta haci uso di e trabao ilegal aki.

Segun fuentenan interno cita pa NOS, e falta di un politica activo di buskeda y deportacion na ambos isla ta nifica un solo cos: Aruba y Corsou tin mester di e potencial laboral ‘ilegal’ pa mantene economia andando.

For di organisacionnan social y bida comercial tin un yamado pa haci e potencial laboral di e Venezolanonan oficial, pero te awo esaki no a duna un resultado.

Gobiernonan di Aruba y Corsou tin miedo, segun NOS, di un efecto di atraccion; nan kier preveni pa mas refugiado ainda bin e islanan. Pa e motibo aki, Aruba ta mantene e frontera aereo ainda cera pa Venezolanonan, pero e posicion riba e lista di UNHCR ta un prueba cu e maneho aki tin poco eficiencia.

UNHCR na Aruba

Diamars 23 di april, Prome Minister Evelyn Wever-Croes a reuni cu e representantenan di UNHCR (United Nations High Commissioner for Refugees) na Aruba. Irene van Rij ta e presidente nobo di UNHCR na Aruba. E dia ey, den un comunicado di prensa, gobierno a bisa cu “desde cu e actual gobierno a sinta na 2017, a dicidi di acredita representantenan di UNHCR na Aruba y ya desde 2018 nos pais tin 2 representante cu ta acredita y reconoci pa Gobierno di Aruba. Na e mesun momento tambe Gobierno a apunta e Keten Manager Venezuela, señora Gina Lopez-Gnecco, cu den nomber di gobierno ta atende cu e instancianan aki y cu tur instituto cu ta traha riba tereno di refugiadonan. Asina Gobierno tin un linea di comunicacion mas directo habri pa cu esaki y te na e momento aki esaki ta trahando hopi bon. Cu UNHCR, e topiconan semper ta trata e cooperacion y con por traha hunto na e miho manera ya cu e realidad ta cu Aruba tin un cantidad grandi di persona indocumenta. Mayoria di e personanan ta di Venezuela pero tambe di Colombia y otro nacionalidadnan y ta importante pa e bienestar di e personanan aki wordo teni na cuenta.”

Igualmente, gobierno a referi na e “Alternative Legal Pathway”, cu ta un forma cu un persona no documenta por yega na haya un permiso na Aruba. Minister di Integracion, Glenbert Croes a menciona cu si e persona a drenta Aruba legalmente y tin opcion cu un doño di trabao ta dispuesto pa firma p’e, y e persona aki no tin antecedentenan penal, e por yega na remarca pa haya su permiso. Esey ta e “Alternative Legal Pathway” y UNHCR ta hopi satisfecho cu alternativa aki, segun e comunicado di gobierno.