Pa Minister di Enseñansa, Ciencia y Desaroyo Sostenibel, Rudy Lampe ta existi un cooperacion positivo di parti di Reino, caminda Aruba no ta para su so pa enfrenta e retonan climatico cu nos unico planeta, den henter universo cu ta habitabel di e forma aki, ta confronta awendia.
Segun Lampe, e mensahe tabata hopi cla na nivel mundial cu ‘nos tin cu pensa global y actua local.’ Pensa global den e sentido cu e cambio climatico ta bay afecta na prome luga e islanan ya sea den Caribe y Oceano Pacifico. E situacion aki ta demanda un accion rapido, ‘no tin tempo mas y mester actua,’ segun e mandatario.
Un echo cu a hala atencion durante e siman cu e delegacion gubernamental a bay New York, ta cu pais Aruba tin un Minister di Educacion y Desaroyo Sostenibel. “Esey ta algo bastante unico y cu hopi a bisa, asina apropia”, segun e mandatario.
E ta haya cu educacion bo tin cu pone na sirbishi di desaroyo sostenibel, ya cu no tin otro manera. Ta importante pa educa e futuro generacion pa loke ta economia circular, respet, integracion den nos naturalesa den conexion cu medio ambiente.
Segun Lampe a hala atencion durante e dianan ey cu Aruba ta canando dilanti pa loke ta e desaroyo riba tereno di educacion sostenibel. “E ta un bon ehempel pa otronan pa combina educacion y desaroyo sostenibel”, el a bisa. Esaki Minister di Enseñansa, Ciencia y Innovacion, Rudy Lampe por a sinti’e for di e delegacion di Reino Hulandes cu a bay Merca siman pasa, caminda e problema di cambio climatico a bira un tema central.
Den e reunion cu nan a sostene, nan por a sinti cu Aruba no por ta un isla riba su mes, completamente aisla den e mundo aki pa enfrenta e retonan grandi cu tini riba e tereno aki. E mandatario a laga sa cu tabata importante pa nan por sinti e compromiso di nos prome mandatario cu tabata uno di ‘cooperacion positivo’ di e delegacion di Reino Hulandes. Pero tambe nan por sinti na nivel di e lidernan mundial e preocupacion existente riba cambio climatico.
Lampe a forma parti di un delegacion encabesa pa prome minister cu a bay New York siman pasa, pa atende diferente reunion den seno di Asamblea General di Nacionnan Uni y tambe cu inversionistanan interesa pa loke Aruba tin di ofrece, muy specialmente pa loke ta trata cannabis medicinal y industria di hemp.
