“UNHCR su notificacion tocante refugiadonan di Venezuela tabata un peticion, no un instruccion. Pero si nos ta tene cuenta cu e situacion unda mester manda e hendenan bek nan pais unda lo por ta dificil pa nan tin acceso na recurso basico.” Asina prome minister ta informa parlamento ayera atardi.

Antayera gobiernonan regional cercano na Venezuela a haya un conseho di parti di agencia di refugiadonan di Nacionnan Uni (UNHCR) pa duna nan asistencia pa trato humano di Venezolanonan cu e paisnan ta mira, cual a inclui pais Aruba. Durante un briefing na parlamento prome minister Evelyn Wever-Croes (MEP) a enfatisa cu e conseho aki no ta mara ningun gobierno ni obliga nan pa yuda. “Pero si e ta un prioridad grandi pasobra nos ta mirando e situacion di cerca pa algun tempo.”

A diferencia di Aruba, segun sra. Wever-Croes, Corsou ya caba a haci un peticion na Hulanda pa nan yuda cu e migracion grandi di Venezolanonan pa nos pais bisiña. Esaki mirando cu na Corsou a experiencia un migracion hopi mas grandi di Venezolanonan cu aki na Aruba. Pero despues cu minister di defensa Ank Bijleveld tabata na Aruba te diabierna ultimo gobierno por a tene palabracionnan mas serio cu e minister Hulandes pa loke ta trata e plan di accion en caso e situacion mester escala y Aruba mester brinda algun forma di sosten.

Sinembargo ora e noticia aki a drenta prome minister a bisa cu no ta algo cu a cay manera sorpresa, pasobra tabata algo cu tabata un preocupacion caba ora mester deporta ilegalnan Venezolanonan pa bay bek nan pais unda ‘por ta nan no lo tin acceso na necesidadnan basico’. “Como un pais cu ta respeta derecho humano nos no por simplemente manda hende bek ora tin un situacion precario asina. Mi no sa si nos a yeg’e awo.” Akinan sra. Wever-Croes ta señala na e manera con ta dificil pa determina si en berdad tin un crisis cu ta afecta un porcion grandi di e poblacion, manera e tratado di refugiado ta stipula.

“Bo ta puntra un persona y e ta bisa bo cu biba na Venezuela ta imposibel, y bo ta puntra otro y e ta bisa bo cu e ta di haci. Nos no tin un manera pa determina kende tin rason.”

Punto di bista di Den Haag vs Aruba

Te na momentonan actual ta wardando un conseho di parti di ministerio di relacionnan exterior di Hulanda pa asina establece un protocol pa vocifera den situacionnan di crisis (woordvoerdingslijn). Ademas gobierno di Aruba mester mira cual lo ta e conseho cu Hulanda lo duna pa asina Aruba ricibi recomendacion con pa actua of tuma accion di manera adecua. ‘Relacionnan exterior tin un liña bastante estricto pa esaki’, prome minister a splica.

Aunke e conseho aki lo por drenta na cualkier momento, mirando e manera rapido cu e tema aki ta desaroya, gobierno lo keda alerta. Prome minister a admiti si cu ora ta atende cu temanan riba nivel di Reino, ta atende cu hende cu ta hopi leu di Aruba y e region Caribense y Latino Americano. Talbes, segun prome minister, algun ta comprende e situacion, pero talbes tin cu no ta compronde e situacion. “Por ta desde Den Haag pa Aruba lo ta facil pa bisa pa laga para y djis pone un banda, pero Aruba ta hopi mas cerca y nos ta wak kico ta sosode. Aki Aruba tin un propio responsabilidad pa yena tambe.”

Sinembargo segun fuente Amigoe Aruba ta raporta, e manera con Aruba a firma e acuerdo di refugiado na 1986 independientemente ta haci e asunto aki un punto di atencion pa e pais y no pa Reino, manera representacion di Hulanda na Aruba ta conta nan.

No ta conoci ainda cerca ken e responsabilidad ta cay, mirando cu te awo no a establece e ‘woordvoerdingslijn’ manera prome minister a señala.