Minister pa Asuntonan Economico y Desaroyo Sostenibel mr. Geoffrey Wever ayera nochi a bolbe Aruba despues di a atende e Conferencia di Cambio di Clima di Nacionnan Uni na Escocia. E biahe di e Minister a bira conoci despues cu e mr Wever mes a duna declaracion na e medio 24ora cu e tabatin dos motibo pakico el a biaha pa Escocia.

E prome tabata pa sostene Ewald Biemans, e hotelero local cu a ricibi un premio importante pa su maneho sostenibel na su hotelnan Bucuti/Tara Beach resort. Manera ta conoci, na COP26 a homenagea sr. Biemans como ehempel pa hopi rond mundo. Pero no ta prome biaha cu Sr. Biemans ta haya un reconocimento internacional di prestigio halto. Sr. Biemans tin un trayectoria impresionante riba e tereno di sostenibilidad, no di awor, sino pa hopi aṅa caba y te asina leu cu Bon Dia Aruba por a compronde, nunca tabatin presencia di un Minister pa a ricibi su premionan internacional.

Bon Dia Aruba a tuma contacto cu vocero di e Minister y tambe cu despacho di Prome Minister Evelyn Wever Croes riba e motibo di e biahe aki, particularmente mirando cu premiacion di un persona priva na Aruba generalmente no ta rekeri presencia di un mandatario. Minister Wever a declara di tabata forma parti di e delegacion di Hulanda, pa asina por cera conoci y crea lazonan importante cu ehecutivonan Hulandes cu ta encarga cu implementacion di programanan di sostenibilidad y tambe bin cu maneho pa Hulanda por cumpli cu e metanan di COP26.

Activista ta yama e biahe di Minister Geoffrey Wever un vakantie caro riba custia di pagado di belasting di Aruba.

E conocido activista pa medioambiente na Aruba, sr. Milton Ponson sin embargo a haci e pregunta bao ki responsabilidad Mr. Wever a biaha pa e conferencia. Motibo ta cu Aruba mes, segun Ponson, nunca a ratifica e tratadonan cu ta e base di e reunion grandi riba cambio di clima. Ta trata aki di tres tratado. E prome ta e Tratado di e Cuadro di Nacionnan Uni pa Cambio di Clima, e UN Framework Convention on Climate Change, UNFCCC cu a acorda riba dje 9 di Mei 1992 na New York. E tratado a drenta na vigor na 1994 y Hulanda a ratifik’e na 1994 tambe. Aruba no a ratifica e tratado, contrario na varios otro pais den Caribe. Corsou y St. Maarten tampoco a ratifica e tratado, cu tampoco ta conta pa Islanan BES. E otro tratado importante pa paisnan compromete na pasonan pa limita accion cu ta afecta clima ta e Tratado di Kyoto di December 1997. Hulanda a adopta e tratado na 2005. Pero atrobe, Aruba no a ratifica e tratado aki. Otro tratado importante cu a bira hopi conoci ora cu ex Presidente Mericano Donald Trump a dicidi pa sali di dje ta e Tratado di Paris, di 12 di December. E tratado a drenta den ehecucion na 2016 y Hulanda a ratifica e acuerdo aki na Augustus 2017. E banco di tratado di gobierno Hulandes riba nan website (overheid.nl), no ta duna ningun detaye di posible validez di e tres tratadonan aki pa e islanan.

Consulta di redaccion di Bon Dia Aruba cu un hurista experimenta den e materia a duna e comentario cu ta existi e posibilidad cu a consulta di antemano cu e otro paisnan den Reino, entre nan Aruba, y cu e ora e tratado, na momento cu Hulanda a firm’e, tin ‘medegelding’ pa Aruba tambe. Consecuencia di esey ta si cu e pais (isla) cu acorda medegelding, ta mara na e obligacion di crea ley pa cu e tema di e tratado. Redaccion di Bon Dia Aruba a logra haya loke recientemente ministro Stef Blok a declara na Tweede Kamer, cu den e caso di e tratado di Paris a pidi pa esaki ta conta pa henter Reino, pa crea e posibilidad cu e paisnan mes despues por acepta e convenio aki. Den e caso di e tratado di Paris, Aruba a declara di ta di acuerdo cu ‘medegelding’ pero naturalmente ta mara na creacion di legislacion, loke te awor no ta conoci kico ta haciendo al caso. Di e dos otro tratadonan no por a haya mas informacion, pero lo follow up riba esaki.

Consulta di redaccion di Bon Dia Aruba cu un hurista experimenta den e materia, cu a comenta cu ta existi e posibilidad cu a consulta di antemano cu e otro paisnan den Reino, entre nan Aruba, y cu e ora e tratado, na momento cu Hulanda a firm’e, tin ‘medegelding’ pa Aruba tambe. Consecuencia di esey ta si cu e pais (isla) cu acorda medegelding, ta mara na e obligacion di crea ley pa cu e tema di e tratado.

Milton Ponson a considera e biahe aki ta mas bien un ‘snoepreisje. Un biahe business class pa Escocia lo no ta menos cu 4000 dollar. “E biahe aki di Minister Wever, kende como abogado mester sa miho encuanto e status di ratificacion di convencion y su protocolnan, tabata un vakantie caro y un gastamento innecesario di placa di pagado di belasting,” tabata e opinion di Milton Ponson.

Bon Dia Aruba no a ricibi contesta di despacho di Minister Presidente ni di vocero di mr.Wever tocante ken a paga pa e biahe pa Scotland, ni cuanto tempo e Minister a keda na e pais Britanico. For di vocero di Prome Minister a tende cu Minister Geoffrey Wever mes lo contesta e preguntanan aki den transcurso di awe.