Sra. Laura Luces kende tabata un di e voceronan di e accion cu a tuma luga dilanti di e consulado di Venezuela na Aruba diahuebs ultimo, a expresa su preocupacion pa e ola di inmigrante Venezolano cu ta biniendo pa keda na Aruba, algun di nan cu mala intencion pa causa di nan necesidad.
“E ta un situacion masha preocupante, pasobra hopi di e persona aki tin hopi necesidad cu hopi di nan ta bin pa comete echo di delincuencia na Aruba”, el a bisa na Bon Dia Aruba.
Preocupacion
Nan ta preocupa pasobra no solamente na Aruba algun Venezolano a mancha e nomber di nan cu acto di delincuencia. El a bisa cu no solamente na Aruba ta yegando hopi Venezolano, sino cu e exodo aki di Venezolanonan ta tumando luga den hopi pais di mundo.
Sinembargo di otro banda e ta haya tristo cu un pais hopi rico manera Venezuela, cu pa añanan largo a habri nan portanan pa hopi inmigrante tanto Europeo como Latino Americano, ta pasando den e situacion aki.
“Unda tabatin dictadura, Venezuela tabata ricibi e hendenan aki cu brasa habri”, el a bisa. Tambe el a agrega cu mara henter mundo por corda di e bon accion aki y cu awor nan por habri nan portanan pa nan. “Awor ta nos esunnan cu ta den un dictadura”, Sra. Luces a declara na e matutino aki.
Sinembargo Sra. Luces a laga sa cu no mester crea un impresion negativo di nan, ya cu e hendenan aki cu ta bin comete delincuencia, “no ta e mayoria di e Venezolanonan”.
El a bisa cu mayoria di e Venezolanonan ta un pueblo trahado, responsabel y alegre. Un pueblo cu ta desea lo miho pa nan y pa henter mundo.
Solidaridad “Toma de Caracas”
Durante e accion pa nan mustra nan solidaridad cu esunnan cu a participa den e marcha “Toma de Caracas” na Venezuela, Sra. Luces a bisa cu e tipo di accion aki ta trece un poco di temor cu ne. Aunke nan ta un marcha pacifico, tin hendenan cu ta infiltra nan mes pa produci echo di violencia treciendo mas problema.
El a bisa cu e regimen actual na Venezuela a purba di boicotia e marcha aki na Caracas. Nan a purba di stroba pa e habitantenan di interior di Venezuela no por yega na Caracas, pero el a bira un exito.
