Minister di Finansa Angel Bermudez ta declara na Bon Dia Aruba cu “absolutamente cu no” cu pais Aruba lo para garante pa cualkier debe cu Citgo lo kier haci pa inverti den e refineria.
Segun minister Bermudez loke e compania Citgo lo haci pa rehabilita e planta “ta pa su propio riesgo y pa su propio interes.” Como organisacion corporativo mundial, Citgo mes lo busca y haya fondo pa rehabilitacion di e refineria; y nan mes lo financia e operacion cu nan lo bay hiba den e refineria na Aruba.
E ta enfatisa cu Refineria di Aruba (RdA) como empresa estatal no tin nada di haber cu cualkier compromiso cu Citgo ta adkiri riba credito of fiansa internacional. “Esey a wordo stipula specificamente tambe den e deliberacion cu Citgo.”
E mandatario a expresa cu Aruba pa medio di su compania estatal RdA a bira doño di e refineria y unico cos cu e ta haci ta huur e refineria cu Citgo, y te eynan su riesgo ta core. E compania estatal aki ta lease e refineria cu Citgo pa un huur anual. E huurmento aki tin un duracion di 15 aña cu posibilidad di renob’e pa 10 aña mas.
Segun minister Bermudez, esey ta e unico transaccion financiero cu tin entre Citgo y e refineria (RdA). “Citgo ta haci uzo di e planta y e ta paga pa e uzo di e refineria un suma cu ta stipula den e acuerdo.”
