Aruba no a subestima menasa di Matthew

Aunke awa ta sigui cay keto bay, efecto di Matthew riba Aruba no tabata uno di lamenta, danki na Dios. Apesar cu tur a bay practicamente normal, Aruba su autoridadnan y pueblo no a subestima e presencia y efecto cu e fenomeno aki por a ocasiona.

Matthew a haci su presencia mas fuerte na Aruba banda di 4’or di madruga, ora cu e tabata situa alrededor di 150 kilometer parti noord di nos isla. Actualmente e ta un horcan categoria 2 cu ta subiendo treciendo cune un rabo masha largo cu sigur cu nos lo sinti su efecto durante dia.

E fenomeno aki a laga cay entre 32 pa 36 mm cubico di awa locual a ocasiona algun dañonan chikito. Algun hende a haya e awa aki manera un bendicion considerando e grado di secura severo cu tabata sufriendo nos isla y nos cunukeronan. Sinembargo a wordo raporta cu algun mata di kwihi a cay, algun kiosco cant’i di lama a keda destrui y algun cas a haya awa, pero nan ta dañonan leve y nada di lamenta. Ta wordo spera cu awa lo sigui cay durante oranan di mainta.

Ultimo noticia di Meteo Aruba:

Servicio Meteorologico di Aruba ta siguiendo di serca ainda horcan Matthew ubica 8’ or di mainta mas o menos na 150km Noord-Noordwest di Aruba. Matthew ta moviendo westzuidwest cu 22 km/hora, cu bientonan maximo rond di e centro di 165 km/ora.

UN ALERTA PA TORMENTA TROPICAL LO WORDO CANCELA PA 11 AM.

ALERTA: UN AVISO PA BOTO CHIKI TA KEDA VALIDO.
ALERTA: UN AVISO PA INHUNDACIONAN DI TERMINO CORTO TA KEDA VALIDO TE DIASABRA MARDUGA.

Pronosticonan:

Diabierna:
Parcialmente nubla te basta nubla. Chens pa awacero compania cu lamper i strena. Biento di zuidwest alrededor di 18 kts, cu rafaga te 35 kts, den mainta, cambiando pa zuidoost 15 kts, cu rafaga te 28 kts, den atardi. Posibilidad di awa 60 %.

Diabierna anochi pa diasabra:
Parcialmente nubla te basta nubla. Chens pa awacero compania cu lamper i strena. Biento di zuidoost alrededor di 18 kts, cu rafaga te 28 kts. Posibilidad di awa 60 %.

E ultimo aviso i resumen tocante e situacion di tempo tropical lo wordo emiti diabierna mainta 11 am esei lo bira boletin nr 10.