Aruba no a clarifica si lo ricibi turistanan Colombiano cu solamente paspoort

E pueblo Colombiano ta masha entusiasma. Entrante 4 di december nan lo por biaha pa gran mayoria di pais Europeo, sin mester di e visa di turismo Schengen, solamente nan mester tin nan paspoort vigente.  
Sinembargo ta bon pa informa cu eliminacion di e visa ta inclui un gran mayoria di e paisnan Europeo, pero no tur.

Tin paisnan  di Europa manera Irlanda y Reino Uni cu ta pertenece na Union Europeo,  pero nan no ta forma parti di e acuerdo Schengen, ya cu nan tin nan propio procedura di inmigracion. 
Mientras cu Noruega, Suisa, Island y Liechtenstein ta pertenece na e espacio Schengen, pero nan a keda afo di e acuerdo cu a suspende e visa aki pa e Colombianonan. Pa tal motibo, e Colombianonan cu lo desea di bishita algun di e paisnan menciona ariba mester di visa.

Hulanda y Aruba
Hulanda (Reino Hulandes) ta entre e  paisnan di Europa cu e Colombianonan lo por biaha entrante 4 di december solamente cu nan paspoort y sin mester di visa Schengen.  
Aunke algun paisnan di nos region cu ta forma parti di e Reino Hulandes lo cuminsa ricibi e turistanan Colombiano sin mester di visa, ainda gobierno di Aruba no a bin cu claridad si lo suspende e exigencia di visa pa e turistanan Colombiano… Of eventualmente nan lo bin cu cierto exigencia pa controla e fluho  di Colombianonan cu lo desea di bin Aruba no como turista sino pa keda.

Tin paisnan cu aunke nan a suspende e visa Schengen pa e Colombianonan,  nan ta exigi cierto rekisito basico cu nan mester cumpli cun’e , entre nan: Paspoort vigente, ticket aereo di ida y buelta, invitacion pa atende ya sea un conferencia of simposio, cierto suma di placa cash of credit card, reservacion di hotel, etc… Si nan ta bay keda cerca di un familiar of amigo, nan mester mustra un invitacion cu e adres di e cas unda nan ta bay keda.  E rekisitonan aki ta cambia di acuerdo cu cada pais su maneho di inmigracion.

No mester di visa    
Entrante 4 di december e Colombianonan lo por biaha pa varios pais di Europa, sin mester di visa Schengen, nan ta: Alemania, Austria, Belgica, Bulgaria, Chipre, Croacia, Dinamarca, Slovakia, Slovenia, Spaña, Estonia, Finlandia, Francia, Grecia, Hungria, Italia, Letonia, Lituania, Luxemburgo, Malta, Hulanda, Polonia, Portugal, Republica Checo, Rumania y Suecia.
Nan lo por bishita e paisnan aki pa maximo 90 dia, durante un periodo  di seis luna. E motibo di nan biahe -sin mester di visa- no mester ta exclusivamente turismo, sino cu e ta inclui asunto di negoshi, conferencia, curso corto, etc… Nan no mester mas di visa  Schengen pa cualkier di e motibonan aki, tanten cu e tempo cu e lo permanece  den e pais no lo ta mas largo cu 90 dia.