Segun un comunicado di Departamento di Salud Publico (DVG) a wordo anuncia cu Aruba su recuperacion ta mustra den direccion di uno positivo y fructifero.
DVG a indica cu turistanan ta ansioso pa cuminsa biaha y ta sondea pa bay di vakantie na e destinacionnan cu tin mas grado di vacunacion, unda nan por ta sigur cu e transmision di e virus di COVID ta uno minimo.
Pa cu esaki, nan a informa cu Aruba actualmente ta luciendo como un number 1 entre e islanan den Caribe y na number 2 entre e paisnan miho vacuna di mundo, manera nan a enfatisa, esaki sigur ta motibo pa nos sinti nos mes orguyoso y tambe encurasha esunnan cu ainda no a forma parti di e solucion pa haci esaki y vacuna.
E meta ta pa yega entre 75% cu 85% di comunidad vacuna pa asina lo recupera e pilar turistico y economia, asina mes nan a informa cu for di awe diaranson 28 di april 2021 e personanan ya no tin necesidad mas pa warda riba un cita pa vacuna.
Esunnan cu no a ricibi su prome vacuna ainda por registra via Aruba Health App of via www.dvg.aw of ww.arubacovid19.org y despues ‘walk in’ na e localidadnan Teresita Center of Centro Libertador Betico Croes y ricibi nan prome vacuna, esunnan cu no por registra online tambe por yega na e puntonan di vacunacion y lo wordo registra y vacuna tambe.
Pa loke ta trata e di dos dosis di vacuna si ta necesario yega na e cita acorda caba, na e momento aki Aruba tin 54% di e grupo di meta 18+ vacuna y nan ta encurasha tur cu ainda no a vacuna pa den e dianan cu ta sigui, yega y vacuna y contribui na nan propio salud, na Aruba su recuperacion y futuro.
