Actualmente un delegacion di gobierno, pero di parlamentarionan tambe a bay Hulanda pa purba di convence nan riba e necesidad di bin cu un negociacion di nobo riba e reglanan di e ley di LAft (Landsverordening Aruba financieel toezicht), y supervisa pa CAft pa sanea nos deficit financiero.

Te ainda e plan di rescate financiero cu e mandatario di Financia, Xiomara Ruiz Maduro (MEP) a biaha cu ne pa presenta na e gobierno Hulandes, no ta conoci. Parlamentario Setty Yarzagaray (MEP) kende ta miembro di e comision di financia di nos organo legislativo, a indica cu pa 2018 – segun reglanan di LAft- mester tin un surplus financiero riba presupuesto di pais Aruba di 0.5% di nos GDP of ingreso di nos pais. Pero esaki no ta posibel, segun e. Minister Ruiz Maduro a bay presenta na Hulanda un presupuesto cu 3.9% di deficit riba nos GDP. Mientras mester ta un surplus segun normanan di e organo di supervision CAft.

Parlamentario Yarzagaray -kende ta un conocedo y experto den cifranan- a bisa cu logicamente 3.9% ta deficit. Pero e punto ta awor si Hulanda ta acepta e proposicion aki. E ta haya cu e plan financiero di gobierno lo ta uno minimalisando tur efecto riba pueblo. Pero e discusion ta, si Hulanda ta bay acepta e plan aki cu no ta cumpli mucho cu e ley di LAft.

Ley di LAft cu reglanan nobo
Den su proposicion financiero, minister Ruiz Maduro ta bisa cu LAft ta caba na 2018, y e no ta duna gobierno nobo hopi espacio pa sanea e situacion aki. Pues nan ta considera cu mester traha un ley nobo y den e ley aki nan ta pensa cu Hulanda a base di un negoshamento, nan por yega na normanan diferente cu tabata para den e ley anterior.

E plan di gobierno ta depende di e decisionnan cu ta bay logra awor entre Hulanda y Aruba, pa sa kico nan ta bay presenta na pueblo. Ya cu den caso cu Hulanda no ta bay di acuerdo cu un 3.9% den su deficit presupuestario pa 2018, gobierno mester bin cu otro escenario of otro tipo di solucionnan. “Pero si nan acept’e, e ta mas suave!”, parlamentario Yarzagaray a bisa. Awor e ta consciente cu gobierno no ta bay soluciona e problema financiero den un aña, sino den cuater aña.

Tambe nan ta considera cu teniendo cuenta cu e ley di supervision financiero, tin mas cu un motibo pa Hulanda bin cu tres KB riba Aruba y no awor, sino for di 2017 caba. “Nos ta den e riesgo aki hopi tempo caba”, el a bisa. Tambe el a declara cu si e presupuesto ta wordo aproba manera cu e ta actualmente, un deficit riba nos GDP di 91%, e conseho ta pa no aproba.

Nan tin pensa pa acerca Hulanda tambe pa nan realisa, cu pais Aruba mester mas tempo. Ya cu e tempo cu nan tin awor no ta e mesun tempo cu e gobierno anterior a haya pa drecha su situacion financiero, locual nan no a haci. Pero e gobierno actual tampoco tin e mesun filosofia politico di e gobierno anterior. “Nos ta buscando e espacio aki di Hulanda tambe pa mustra cu nos ta ocupa cu esaki y duna nos e chens pa asina mitiga e efecto riba pueblo.” E meta ta pa yega na un presupuesto balansa y sostenibel final di dia.

Recomendacion y Hulanda
Pa e motibo aki, gobierno di coalicion (MEP-POR-RED) ta ocupa pa atende palabracion cu Hulanda, y den e caso aki cu secretario di estado. Parlamentario Yarzagaray ta haya cu Hulanda tabata full desvia di informacionnan cu a wordo presenta anteriormente. E ta kere cu Hulanda mester duna espacio necesario pa drecha e situacion realistico cu nos ta para riba dje, y tambe nos comunidad. E ta kere cu ta necesario pa nan bin di biaha cu un panorama realistico pa ‘no gaña niun hende y ni Hulanda.’

E situacion aki ta demanda no solamente vision, sino curashi pa saca nos pais di e situacion financiero dificil aki. Ya cu den e plan cu gobierno a bay presente na Hulanda, nan ta papia di un debe riba nos GDP di 91%. Nan como parlamentario di fraccion di MEP ta den palabracion cu gobierno con e situacion ta. E panorama cu nan ta haya, ta crea cerca nan un preocupacion grandi. Ya cu si nos ta yega cerca di 100% di paga debe for di nos GDP, nos pais ta bay failliet.

Segun parlamentario Yarzagaray, no solamente Hulanda, pero IMF (Fondo Monetario Internacional), den varios ocasion a bin cu recomendacion of consehonan riba parti fiscal, caminda e organismo internacional aki a adverti den varios ocasion cu si Aruba ta sigui den e tendencia ey, nos lo confronta problemanan serio. Esaki inicialmente cu e proyectonan di energia alternativo, sin inclui ainda e proyectonan grandi di infrastructura, ya cu Aruba no por carga e tipo di proyectonan aki, entre nan PPP, ya cu nan tabata exigi inversion hopi grandi.

Nan ta evaluando e recomendacionnan di IMF, ya cu algun di nan ta valido ainda. For di parlamento nan ta dispuesto pa contribui cu ideanan na gobierno. Nan kier mantene un actitud pro-activo di no limita nan mes den parlamento, warda ki ora nan ta bay controla. Sino cu nan por yuda evita pa yega na cierto puntonan.

Di otro banda, parlamentario Endy Croes (MEP) a bisa cu Hulanda ta complice di e disaster financiero di pais Aruba, y cu nan mester carga tambe parti di e responsabilidad aki. Segun e parlamentario te ainda, e no a wak nada documenta riba plan di gobierno pa atende e crisis financiero. P’esey e no por duna un opinion corecto riba e punto aki. Tambe el a haci un apelacion na pueblo den caso cu mester bin cu medidanan. “Nan ta compronde e situacion desastroso cu nos a haya e luga aki aden”, el a declara.

Nan ta bay sondea tur caminda of instancia gubernamental unda nan por corta, prome cu dado caso mester pidi ‘pueblo un ayudo’. Encuanto aumento of introduccion di mas belasting, el a bisa cu nan lo trata lo menos posibel esaki. El a recorda cu cualkier medida cu lo por bin for di gobierno ta parlamento ta esun cu mester aproba finalmente. Nan tin te hasta dia 30 di april pa aproba e ley di presupuesto, y prome cu e ta wordo aproba, nan por bin cu cambionan tambe.