Gobierno a hinca Aruba den suficiente debe caba, entre otro cu e programa di proyecto ‘PPP’ cu ta poniendo casi un extra mil miyon florin pa nos haya paga, riba e cuatro mil miyon di debe cu nos tin. Pregunta ta anto unda nos por economisa. E proyecto di prestigio ‘Green Corridor’ ya ta den ehecucion pero esun di e ringweg na Playa ta algo cu nos por analisa bon pa mira si berdaderamente nos mester di esaki. Kico ta e historia di e ringweg aki? Mas di cuarenta aña pasa ingenieronan na DOW, contemplando e futuro desaroyo urbano di Oranjestad, a considera cu lo ta necesario pa crea un caminda rond di e casco urbano di e tempo ey, pa facilita fluho di trafico di un banda di ciudad pa otro. Esaki tabata tene cuenta caba cu aumento di trafico di aeropuerto pa e zona di hotel y despues a bin acerca e transporte pisa cu mester bay di Barcadera pa e zona hotelero, ya cu gran parti di e containernan cu ta yega Aruba mester bay pa e parti pabao di Playa y e area di hotel.
Hopi aña pasa caba a cuminsa cu e compra di e terenonan necesario cu ta riba e trayecto proyecta di e caminda aki. A tarda decada y te awor no mas a conclui e parti di adkiri e propiedadnan. Pero, mientras tanto Aruba a crece hopi mas di loke tabata e proyeccion den añanan 60 y 70. Oranjestad a bira un aglomeracion urbanisa hopi mas grandi cu loke tabatin riba mapa e tempo aya. Practicamente por bisa cu Playa a crece pega na Tanki Leendert, Noord, Paradera y tur loke ta keda parti panort di e ruta Tanki Flip – Santa Cruz. Ta casi comico pa mira na diferente luga ainda un borchi cu ta bisa “Bebouwde Kom” na entrada di Playa, mientras na ambos banda e luga ta mes urbanisa.
E necesidadnan di trafico a haci necesario realisa extende e caminda di Tanki Flip via Hato te Sasaki, habriendo asina un trayecto hopi util cu a conecta cu area di hotel sin pasa den Playa ni den Noord. E creacion di e caminda grandi di Sasaki for di Playa y e posibilidad di acceso na Playa via Schotlandstraat a haci cu ya caba pa hopi aña tin alternativa pa no mester pasa via L.G. Smith Boulevard. Por bisa cu den cierto sentido e caminda di Santa Cruz/ Paradera/ Tanki Leendert/Tanki Flip/Sasaki ta caba un ‘ringweg’ cu ta brinda e posibilidad di evita pasa den Playa.
Un di e problemanan cu ta existi ainda ta cu no tin un bon conexion entre aeropuerto y rotonde di Paradera. Unabes por logra esey, y esaki ta proyecta como parti di e ringweg tambe, e pregunta pakico mester bin un trayecto atravesando Modanza, Sero Blanco, Ponton y Bushiri, si e idea tabata pa tin un trayecto cu ta bay den direccion di e hotelnan. E parti di e trayecto cu ta bin di Bushiri bin pega riba luz di trafico na Sun Plaza ta uno obsoleto na e momento aki. Mester contempla tambe kico e ringweg aki ta pretende di soluciona den e trafico di tur dia. Banda di congestionamento den y rond di Playa un di e problemanan cardinal ta e fluho di trafico cu ta drenta Playa tur mainta y ta sali tur merdia y atardi. E fluho aki ta asina pisa cu e ta ocasiona problema na tur e rotondenan di e ‘ringweg’ Santa Cruz/Paradera/Tanki Leendert/Tanki Flip.
E pregunta grandi ta si e ringweg proyecta ta bay yuda den esaki, pasobra e no ta crea mas via di acceso y salida di Playa pa e areanan urbanisa alrededor. E lo ta un gasto hopi grandi, como 440 miyon florin, bastante mas caro cu e Green Corridor. Si opta pa traha solamente e parti entre Cumana y Paradera esaki caba ta crea un bon alternativa pa trafico cu mester bay direccion pabao y no ta envolve e gastonan grandi di completa henter e ringweg.
Aparte di esey, buskeda di financiamento mester a keda cla den prome trimester di 2016 cual no ta e caso. Si resulta cu mester considera e posibilidad cu e proyecto no ta keda realisa, mundo no ta caba pa nos. Anto den e caso ey por opta pa realisa e parti cu ta conecta Aeropuerto cu Paradera y laga e resto di e plan keda un plan. Naturalmente e actual gobierno lo no ta di acuerdo, ya cu nan ta mira e plan como un manera pa crea otro ‘monumento pa partido’. Pero hecho ta cu bao di tanto diferente gobierno a traha riba esaki cu no por bisa cu e ta ‘propiedad intelectual’ di un partido so. Ademas den gobernacion no ta prestigio mester manda pero sano huicio. CAFT den su ultimo rapport unda nan a duna nan evaluacion di e proyectonan PPP a yega na e conclusion caba cu nos no por maneha mas proyecto y e ringweg realmente ta haci cu nos ta surpasa e norma cu CAFT ta propone como maximo pa inversion asina.
