– E yobida pisa cu a cay recientemente y cu a ocasiona cu hopi awa a stagna rond di nos isla, no solamente ta bira un focus di malesa pa nos poblacion, sino pa nos bestianan tambe.
Veterinario Ricardo Contreras ta alerta nos poblacion riba e prevencion cu nan mester adopta contra cierto malesa cu por afecta nos poblacion di bestianan. El a bisa cu actualmente ta existi un alerta relaciona cu un brote na Florida di Schroefworm.
Schroefworm
El a splica cu Schroefworm ta un bichi cu ta wordo treci pa musca. Ya caba na Miami a wordo raporta un serie di caso cu ta demanda pa nos ta alerta na Aruba tambe. E ta un bichi cu ta produci parasitonan den e herida di e bestianan. E ta bisa cu ora e bestia ta infecta cu e bichi aki e ta “hopi evidente”. Den un caso asina e doño di e bestia mester bay veterinario di biaha.
Veterinario Contreras a declara cu no necesariamente e infeccion aki pa via di e bichi Schroefworm ta resulta mortal pa e cacho. Pero mester tene na cuenta cu e ta un malesa cu por afecta hende tambe. E ta un musca hopi specifico cu e bichi cu e musca ta plama por afecta herida no solamente di bestia sino di hende tambe. “E ta afecta bestia di sanger cayente y ser humano tambe”, el a laga sa.
E musca su nomber cientifico ta “Cochliomyia”. E ta transmiti e bichi of Schroefworm cu ta uno carnivoro di origen desconoci. E bichi adulto ta den realidad un musca cu general ta pone su webonan den e herida nan habri di e bestia. E bestia infecta cu no ta haya tratamento na tempo lo por muri den un periodo di 7 pa 14 dia pa causa di infeccion secundario of toxico. E bichi aki conoci tambe como “Nuevo Mundo” por causa daño na ser humano y na nan mascota. E ta relativamente facil di detecta y facil di trata den ambos caso.
Contrabanda di bestia
Den pasado a yega di presenta brote di Schroefworm riba nos isla, pero esaki a wordo controla hopi bon y actualmente el a wordo practicamente elimina. Pero aworaki alarma a wordo bati pa ta alerta ya cu tin casonan cu a wordo raporta den nos bisindario. “Nos tin hopi conexion cu Miami cu exportacion y importacion di bestia”, el a bisa. Pero otro factor ta e temporada di yobida cu nos ta conociendo ultimo dianan.
Encuanto si e tipo di caso di contrabanda di bestia cu ta tumando luga na Aruba por bira un factor peligroso pa importa e tipo di malesa aki y otro tipo di virus pa nos bestianan local. “Mester tene cuenta cu esey por trece malesa manera distemper, Schroefworm y Parvo virus tambe…”, el a bisa.
Aunke e ta haya cu e tipo di contrabanda di bestia cu a wordo descubri recientemente no ta algo cu no ta sosode frecuentemente riba nos isla compara cu pasado. El a indica cu 24 aña pasa e contrabanda di bestia tabata mas grandi cu awor.
Prevencion
Igualmente el a conseha pa preveni cualkier sorto di malesa di bo mascota durante e temporada di yobida aki. Ya cu den e temporada aki ta wordo registra casonan di Parvo virus specialmente den puppy despues di cierto yobida. Mientras cu distemper a pesar cu tin vacuna contra e virus aki, e malesa aki ta uno comun den hopi region di mundo.
Tambe e yobida aki ta trece mas musca y sangura cu ta transmiti malesa. Pero tambe e awanan ta trece otro sorto di bestia manera carpata, purga, etc.. E ta conseha cu e doño di bestia mester preveni nan prome cu e yobida. “Si bo tin bo cacho vacuna esey ta bay yuda pa nan wordo afecta menos”, segun veterinario Contreras.
Mester uza productonan pa preveni carpata y purga ya sea pa medio di pildo, baño, etc.. E ta haya cu e momento aki ta ideal pa vacuna e bestianan cu ainda no a haya nan vacuna anual.
