Aruba mester medida… Cu ta bay yuda di berdad…

E brote di e corona virus a causa cu yen di negoshi a cera porta y tambe hopi persona a keda sin trabao. Un advertencia serio cu ta indica cu “prome cu cos drecha e lo bira peor”. Banco Central no tin hopi reserva, por ta 3, 4 of maximo 5 luna ya cu no tin casi ningun importacion. Entrada no tin pasobra turismo a desaparece, cu anualmente ta percura pa gran parti di nos exportacion – di servicio – di alrededor di 4.000 miyon florin. E trahador averahe di Aruba ta usa su placa pa compra di producto y servicio.

Of ta manda remesa na nan pais di origen, si ta trata di inmigrante, causando asina huida di divisa.  Nos ‘spaarquotum’ na Aruba ta relativa abao compara cu paisnan cu e mesun nivel di desaroyo.  Esaki ta e motibo cpakico e reserva di Banco Central no ta surpasa 3 a 4 luna di importacion. E shutdown di turismo ta significa cu nos fuente mayor di entrada (na divisa) a desaparece den aire. E concecuencianan di esaki ta mas grandi di loke nos a conoce den añanan 1980 (cu ciere di Lago) y na 2008 cu e crisis economico yfinanciero global, y nos no ta premira un recuperacion prome cu fin di aña. Djis pensa cu cinema, restaurant, biahamento, bus y otro transporte publico ta riba un paro casi completo.

Den e situacion cu nos ta aden no ta keda nos nada otro di busca ayudo den forma di un fiansa grandi for di gobierno Hulandes bao di condicionnan hopi faborable, pa por surpasa e periodo dificil aki. Cu ciere di Lago e tempo aya nos gobierno a busca un prestamo na Hulanda di 100 miyon florin. Na e momento aki na nos humilde opinion nos mester un suma di por lo menos 20 biaha mas grandi. Claro cu mester calcula y determina e suma, algo pa expertonan financiero bao guia di por ehemplo un econometrista, sosteni pa un grupo di experto den materia financiero. Pa ta mas claro: 2 mil miyon florin cual ta mas o menos 50 % di loke nos ta produci actualmente como pais pa aña. E placa di prestamo aki mester ta destina pa sostene nos economia y mantene hende na trabao.  Esaki kiermen cu mescos otro paisnan, manera Hulanda y Merca e placa mester bai directamente na e empresanan pa asina nan por mantene nan trahadornan na trabao.

Si e pensamento ta cu ta bai duna bijstand solamente na esnan cu a perde trabao y asina kere cu nos por scapa nos economia, nos lo sali bon equiboca. Ta di spera cu e articulo aki fomenta discusion fuerte cu al final por yuda Aruba sali dilanti.