Ariba 15 september, 2017, e tayer titula: ‘A rapid assessment of co-benefits and trade-offs among Sustainable Development Goals pertaining to the Planet: Evidence from Aruba’ a termina. E tabata un tayer intensivo cu a dura dos siman largo. Pa medio di un comunicado, Unesco ta informa tambe cu un di e recomendacionnan cu a bini dilanti den e tayer aki ta cu Aruba mester haci un bon estudio den risiconan di desaster relaciona cu tempo y lama.
E idea tras di e curso tabata pa señala e beneficionan y obstaculonan entre objetivonan di desaroyo sostenibel (SDG), relaciona na nos planeta. E metodologia ta basa riba un estudio haci pa medio di e Nereus Program, presenta tambe na Nacionan Uni. E diferencia entre e estudio na Aruba cu e estudio original segun Unesco, ta cu awor a concentra riba un isla chikito den desaroyo manera Aruba, na luga di datos mundial. Tambe diferente na e studio original ta cu e estudio original tawata pone mas emfasis riba SDG 14 “life below water” (bida bao di lama). Mientras cu e estudio na Aruba a incorpora mas metanan pa desaroyo sostenibel. E Nereus Program ta un iniciativa interdisciplinario global di entre otro varios universidadnan, cual tin e tarea pa aumenta e conocemento pa logra e mihor forma pa mantene e sostenibilidad di lama rond mundo.
Recomendacion di expertonan
E tayer aki a wordo dirigi pa un experto di e Nereus Program. Fuera di e experto aki, a bin tambe un experto di lama di UNESCO su ‘Commision Intergobermental di Oceano’ (UNESCO/IOC). E experto aki a duna informacion di e importancia relaciona cu lama pa un isla manera Aruba. Lama ta di suma importancia pa un isla chikito manera Aruba cu ta depende pa un gran parti directamente/indirectamente di lama, y unda mayoria di su infrastructura di importancia ta cerka di lama. E experto a indica cu Aruba ta sumamente vunerabel pa eventonan di lama cu por causa desaster o perdida grandi na Aruba su economia y infrastructura. E experto a sinta cu diferente politico di Aruba pa mustra nan ariba e importancia pa Aruba pa su maneho den conexion cu lama, den cuadro cu desaroyo sostenibel. Tambe a mustra e politiconan cu Aruba mester realisa su mes cu clima ta cambiando.
Factornan relata na lama cu antes no tabata di importancia a bira awo sumamente importante segun Unesco. Por ehempel, cierto tipo di ‘zeewier’ ta birando un fastidio pa Caribe, y por tin un efecto directo riba nos turismo. Adicionalmente resake/swells por bay tin mas efecto negativo riba Aruba compara cu antes, segun e expertonan a trece pa dilanti. Recomendacion ta cu Aruba mester bay den e direccion di haci un bon estudio, cu datos actual, den ‘Risico di Desaster’, cu ta inclui tempo, clima, sismo y lama.Tambe Aruba mester bin cu un bon sistema di monitor por ehempel tempo y lama.
E experto di e Nereus Program, kende a dirigi e tayer aki na Aruba, lo bay analisa e datos di e tayer pa despues brinda su informacion na Unesco, cu lo publica e datos aki. Hopi experto local for di diferente departamento y instancianan di gobierno, tambe NGO-nan a assisti na e tayer aki.
Unesco Aruba kier gradici director di Meteo, sr.Marck Oduber kende a organisa e tayer aki anto a logra haya e fondonan necesario for di Unesco Internacional. Sr. Oduber ta e liaison scientifico den e comision nacional di Unesco Aruba. Tambe Unesco Aruba ta desea pa felicita sr. Marck Oduber cu e logro grandi di a wordo escogi internacionalmente como Vice-Presidente di IOCARIBE pa representa e deseonan di e islanan chikito den Caribe. IOCARIBE ta e division di UNESCO/IOC pa Caribe, Merca, Sur America i America Central.
