Bon Dia Aruba a entrevista Orwin Gomes, kende ta studiando na Hulanda na Lucia Marthas Institute pa performing arts HBO. E falta poco pa e caba. El a wordo tuma pa baila den crucero pa 6 luna largo.

Sr. Gomes ta splica Bon Dia Aruba cu el a cuminsa baila na edad di 4 aña, cu su dedicacion y su amor pa baile. El a bay ‘Step by Step Dance Academy’ y tambe a cuminsa su estudio na EPI, pero no a caba esaki pa motibo cu el a sinti cu e kier a eherce mas den su arte, cu ta baila.

El a dicidi di bay Hulanda, pa asina sigui cu su carera di bailamento. El a cuminsa studia prome na MBO Rijnijssel pa dos aña, despues el a caba y sigui su estudio na ‘Lucia Marthas Institute pa Performing Arts HBO’. Sr. Gomes ta bisa cu eynan e la siña varios parti di arte ,manera trabou moderno, fotografia, notanan musical y tambe cantamento.

Sinembargo, sr. Gomes ta splica cu tempo el a caba di yega Hulanda e tabata activo den su bailamento, te haya e oportunidad di baila na diferente luga. Un amigo di dje a invit’e pa duna les di Zumba. “Por bisa cu mi a bira famoso den varios ciudad pa haci esaki.”

Den e plannan di sr. Gomes ta bisa cu e no tin pensa di bolbe Aruba pa mucho largo. E kier logra mas conexion cu hende rond di mundo, y bira ‘mas famoso de area di bailamento’. “Despues di esey mi kier bin bek Aruba, pero cu ideanan y plannan grandi cu mi tin di awo den mente caba”, sr. Gomes ta bisa. Agregando cu e ta prefera no bisa te ora cu e wak nan pasa.

Un cos cu sr. Gomes ta bisa cu Europa a ofrece mas oportunidad cu na Aruba mes. “Aki na Europa, un persona cu ta baila ta haya un miho pago. Tin variedad di actividadnan manera musical, trabou di modelo, por biaha rond na cualkier otro paisnan of ciudadnan. Bo oportunidad na Europa ta mas grandi, pero claro tambe mester tin suerte y traha hopi duro p’e.”

Actualmente, Orwin ta splica cu e no ta mucho activo dunando les of bailando manera antes na otro actividadnan, pa motibo cu e ta ocupa cu scol cu ta baila y studia arte henter ora. “Esey no kiermen cu mi a stop. Mi no kier kere masha di mi mes, pero na mi scol na Groningen mi por bisa mi ta un di e miho bailadonan cu tin. Mi ta bisa esaki paso tambe esaki ta locual mi stima, mi ta pone dedicacion y pasion trahando hopi duro pa logra esaki.”

Un di e metanan cu sr. Gomes tin pa su bida, sea awo of pa futuro, ta cu e kier haci mas musical of pa bay un crucero pa 6 luna. “E ta duna ami un oportunidad pa crece y biaha rond.”  Sr. Gomes a ricibi su aceptacion cu e lo bay den crucero pa haci esaki.

Sinembargo, sr. Gomes a bisa cu tur locual e ta haci, e ta pasiona. “E no ta importa si mi gust’e of no. Mi por ta trahando den algo completamente diferente cu mi no gusta, pero mi ta haci cualkier situacion den uno positivo y mi ta duna tur di mi. Algo cu mi ta kere den dje ta cambia tur cos negativo pa positivo. Na final di dia, abo mester gusta locual bo ta haci.”

Palabra di motivacion cu sr. Gomes ta duna na otro, ta pa ‘no laga edad stop bo nunca’. E ta remarca cu el a bin studia na Hulanda cu un edad grandi, pero esey no a stop e. Pa no importa con leu un persona ta, pero semper keda humilde. “Tur hende mester bay p’e. Acepta tur e retonan cu bida ta bin cune. Corda semper cu sin un porta cera, e otro ta habri.”

Den a parti di Aruba, e ta kere cu Aruba mester por patrocina esunnan cu ta den arte, of ta studiando algun arte, pero ‘esunnan cu ta pasando duro’. “No tin patrocinado pa e bailadonan y nan arte. E ta un lucha pa esunnan cu no tin placa pa tayernan, of pa crece den diferente parti di arte. Ta ora pa Aruba cuminsa cambia e mentalidad, pa nan stop di patrocina esunnan cu ya caba tin e placa, y cuminsa pone enfoke na esunnan cu tambe tin talento of ta eherciendo nan talento.”

El a finalisa ta bisa cu tambe mester aprecia esunnan cu ta laga Aruba pa asina por studia arte. Agregando cu comunidad mester acepta y duna apoyo na otro. E ta bisa cu e lo sigui comparti su pensamento riba esaki.