E palabracionnan pa continuidad di sosten di likides y e entidad di reforma y desaroyo, COHO ta riba mesa di Minister pa Asuntonan General, Prome Minister di Hulanda Mark Rutte. Pero con concreto por conta riba e palabracionnan ta depende di e decision si e Gabinete Hulandes ta keda of si ta entrega retiro.

Gobierno Hulandes ta confrontando un reto grandi, cu ta, maneha e crisis di COVID-19. Pero tambe un inhusticia cometi door di Gobierno, particularmente Servicio di Impuesto contra un cantidad di mayor cu a bira victima di un maneho discriminatorio riba kinderopvangtoeslag.

Drama opvangtoeslag

Na 2005, Servicio di Belasting a haya responsabilidad pa paga e toeslagen, cu mesora a bay robes pa motibo di sistemanan. Na 2009 a bin señalnan cu a haci abuso cu e toeslagen. E asina-yama gastouderbureaus (e persona intermedio entre mayornan di un mucha y e persona cu ta cuida e mucha. E oficina ta trece e partidonan hunto), ta informa mayornan con por pidi e toeslag, hasta ora muchanan ta bay na welonan, sin cu mester paga nan mesun contribucion. Di e forma aki e oficinanan malafide aki ta cobra ilegalmente. Servicio di Belasting a bay tras di e mayornan cu no a paga nan contribucion, y Corte a duna e ordo pa paga e placa back. A bin un medida antifraude cu a crea teamnan special pa bay tras di e oficinanan, pa permiti e proceso bay mas lihe.

For di 2013 sinembargo, tabatin señalnan regular cu e maneho contra fraude aki tin consecuencia pisa pa cierto mayor. E Ombudsman a traha un rapport specifico riba e situacion aki na 2017. Tabata mira e casonan aki como incidental. Pero tabata despues di pregunta di Tweede Kamer y abogado di algun mayor y periodistanan di Trouw y RTL cu a mira cu e problemanan tabata mas grandi. Miles di mayor a perde tur cos, hasta perde nan yiunan sin motibo. Gobierno Hulandes pa dicidi pa compensa esnan cu a sufri daño, pero e proceso ta cana lento. Un rapport ‘Ongekend onrecht’ a keda presenta na Ddecember, 2020 unda a caba cu e maneho di e diferente gabinetenan Hulandes riba e tema aki. E miles di mayornan ta pidi Gabinete Hulandes pa asumi responsabilidad y tuma retiro.

Diabierna awor, Gabinete Mark Rutte ta reuni pa discuti e consecuencianan di e affaire aki, unda ta hasta considera retiro di e gabinete completo. E partidonan di coalicion ta tene cuenta cu e gabinete mester bay pa motibo di e sufrimento di e victimanan, pero no ta de acuerdo riba e paso extremo di retiro pa motibo di e crisis di corona. E partidonan di coalicion ta di acuerdo cu no ta bay sacrifica un solo Minister, pero cu tur lo mester bay. VVD di otro banda ta bisa cu si e Gabinete bira demisionario, e maneho di coronavirus lo mester continua.

Efecto pa Aruba

Na e momentonan aki tin dos rijkswet riba mesa, e Rijkswet Financieel Toezicht Aruba, RAft y mas importante, e rijkswet Caribisch Orgaan voor Hervorming en Ontwikkeling, cu mester yuda e reforma y resiliencia di economia y sociedad di Aruba. Ainda e leynan no ta cla. E palabracionnan pa sosten di likides y pa e crisis di corona tin su limite y na momento cu of si Gabinete Hulandes cay diabierna, no ta conoci kico lo pasa cu e palabracionnan.

Siman pasa ainda, Secretario di Estado Raymond Knops a bisa cu no por compromete e siguiente Gobierno Hulandes cu mester bin despues di maart. Lo tin eleccion na maart. Sinembargo, si Gabinete Mark Rutte cay, e Gobierno ta bira demisionario y no por tuma decisionnan nobo. E palabracionnan haci lo sigui, pero no por ehempel, un decision pa extende e ayudo medico pa COVID-19 na hospital, y extension di e servicio di specialista y nursenan di exterior cu ta yudando Aruba pa atende cu esnan afecta pa e pandemia.

Bon Dia Aruba a tuma contacto cu vocero di Secretario di Estado Raymond Knops, Emile Vaessen kende a bisa cu Gabinete Hulandes no a tuma ningun decision pa retiro ainda. Ademas, cu e palabracionnan cu Aruba awor ta den man di Minister Presidente Mark Rutte. Den caso cu e gabinete tuma retiro, Tweede Kamer lo dicidi cua palabracion lo por continua. Tweede Kamer lo tuma decision cua ta temanan controversial. Na momento cu e gabinete bira demisionario, sea ta despues di diabierna of na maart, comisionnan di Tweede Kamer lo reuni pa determina cua tema ta controversial of no. Esakinan ta proposicionnan di ley, AMvB (Algemene Maatregelen van Bestuur). Tweede Kamer ta dicidi riba e lista pero si kier trata e temanan controversial, lo mester haya aprobacion di mayoria.

Den otro palabra, Aruba lo ta depende di disponibilidad di mayoria di Tweede Kamer pa continua cu e rijkswet COHO y otro palabracionnan di sosten.